Одземени 27 парчиња оружје, 604 куршуми и 10 експлозивни средства во меѓународна акција „TRIGGER X“

Во меѓународната оперативна акција „TRIGGER X“, организирана од ИНТЕРПОЛ од 22 јуни до 5 јули 2026 година, во Македонија биле одземени 27 парчиња оружје, 604 парчиња муниција и 10 минско-експлозивни средства. Во акцијата учествувале Министерството за внатрешни работи и Царинската управа, со цел спречување на нелегалната трговија со оружје и прекуграничниот криминал.

— реклама —

Во рамки на активностите биле извршени 35 претреси, а контролирани биле 548 лица и 382 возила. Дополнително, биле проверени податоците за повеќе од 500 лица и 300 возила во полициските бази.

Во предоперативната фаза, при два претреси, биле пронајдени три пиштоли, 115 куршуми, рамка за оружје, седум ловни патрони, три рачни бомби и барут. При увид по пријава биле одземени уште еден пиштол, рамка, импровизирана направа за испукување куршуми и 77 куршуми.

— реклама —

За дел од пронајденото оружје и муницијата се преземаат мерки за поведување кривична постапка. За управна постапка биле одземени и три ловни пушки, една пневматска пушка и 128 ловни патрони.

— реклама —

При засилените контроли на граничните премини биле лишени од слобода две лица. На „Табановце“, во возило управувано од австриски државјанин, била откриена непозната материја, по што лицето било лишено од слобода поради сомнение за кривично дело според член 215 од Кривичниот законик. На „Меџитлија“ било пронајдено лице евидентирано на стоп-листа, кое било предадено на понатамошно постапување.

Дополнително, биле извршени четири вонредни контроли во стрелачки клубови и две во цивилни стрелишта. При контрола во клуб во Прилеп биле одземени ловна пушка и револвер.

Од МВР посочуваат дека меѓународната соработка и размената на информации се важни за спречување на нелегалната трговија со оружје, муниција и експлозивни средства.