Охрид од 1 до 9 септември ќе биде место на средба на уметници од Македонија и странство, во рамки на првата Меѓународна ликовна колонија „Лихнид – Охрид“, организирана од Општина Охрид.
На колонијата ќе учествуваат 17 ликовни уметници, кои во текот на деветдневниот престој ќе создаваат дела инспирирани од охридските пејзажи, културното наследство и препознатливиот амбиент на градот.
Меѓу учесниците од странство се Анета Гајос од Полска, акварелистка, графичарка и основачка на IWS Polska, Наталија Студенкова од Словачка, академска уметница со украинско потекло и организаторка на меѓународни уметнички настани, како и турската академска сликарка Ѓулај Јуксел, која зад себе има 51 самостојна изложба.
Од Канада пристигнува уметникот со македонски корени Мајкл Клоуз, кој дипломирал на Ontario College of Art и има реализирано повеќе од 140 самостојни изложби. Во колонијата ќе учествува и Жужана Ардо од Велика Британија, визуелна уметница, писателка и кураторка чија работа ги поврзува уметноста, науката и општеството.
Србија ќе ја претставува академскиот сликар и историчар на уметност Меџид Факиќ, универзитетски професор и автор на 64 самостојни изложби, додека од Индија ќе учествува Раџат Субхра Бандопадхјај, познат по акварелите инспирирани од индиската култура и традиција.
Од Бугарија ќе гостува графичарката Павлина Копано-Боботанова, која живее и работи во Истанбул и во своето творештво користи рачно изработена хартија, истражувајќи текстури, релјефни структури и колорит.
Македонската уметничка сцена ќе биде претставена од повеќе автори. Славица Танеска, академска сликарка, магистер и куратор и уметнички раководител на колонијата, е авторка и на нејзиниот визуелен идентитет и логото.
Во колонијата ќе учествуваат и проф. д-р Фехим Хусковиќ, академски сликар, графичар, професор и академик со околу 120 самостојни изложби и повеќе од 40 национални и меѓународни награди, како и проф. м-р Мирко Вујисиќ, академски графичар и сликар и редовен професор на Факултетот за ликовни уметности при УКИМ.
Охрид ќе биде претставен од Славко Упевче, еден од позначајните современи охридски уметници, кој повеќе од пет децении твори и е познат по делата инспирирани од охридската архитектура, природата и културното наследство.
Дел од уметничката програма ќе биде и Лидија Вујисиќ, графичарка и долгогодишна професорка по графика и графички дизајн, која има учествувано на околу 200 домашни и меѓународни изложби.
Меѓу македонските учесници се и охриѓанката Емел Махмуд, академска сликарка и ликовен педагог, која инспирацијата ја наоѓа во природата, охридските пејзажи и духовната филозофија, како и Никола Упевче, академски сликар, конзерватор, реставратор и мозаичар, автор на повеќе мозаични проекти, меѓу кои и монументалната „Мозаична мапа на Охрид и Лихнид“.
Од Куманово пристигнува академскиот сликар Андреј Антевски, кој во 2025 година ја реализираше својата прва самостојна изложба „Секојдневие“ и е добитник на наградата „Борко Лазески“.
Учесник на колонијата ќе биде и охриѓанецот Тони Попов, мултимедијален уметник, сликар и поет, кој досега реализирал 15 самостојни изложби, а преку својата Летна уметничка школа „Пробај уметност“ има работено со повеќе од 200 деца.
Првата Меѓународна ликовна колонија „Лихнид – Охрид“ има цел да создаде простор за уметничка размена и меѓународна соработка, но и преку творештвото на учесниците дополнително да ги афирмира Охрид и неговото културно и природно наследство.
