Охрид со нови капитални проекти: Катна гаража, пречистителна станица и спортска сала

Изградба на современа катна гаража во центарот на Охрид, пречистителна станица во Трпејца, нова спортска сала и продолжување на реконструкцијата на охридската гимназија се дел од проектите што градоначалникот Кирил Пецаков ги издвои во пресекот на првата година од својот втор мандат.

Пецаков оцени дека годината ја одбележале продолжувањето на започнатите проекти и реализацијата на нови капитални инвестиции во инфраструктурата, образованието, животната средина, спортот, културата и туризмот.

„Како што ветивме, веќе е во тек изградбата на современата катна гаража во централното градско подрачје, проект кој ќе придонесе за подобра организација на сообраќајот и поголема функционалност на центарот на градот“, изјави Пецаков.

— реклама —

Тој ги посочи и реконструкцијата и уредувањето на плоштадот „Чинар“, како и целосното партерно и хортикултурно уредување на „Холандскиот парк“.

Според Пецаков, целосно биле реконструирани улиците „Прилепска“ и „Аџи Мустафа“, биле асфалтирани улици во населбата „Бараки“, како и патот што ги поврзува Лескоец и Велгошти.

Градежни активности биле реализирани и во Горно и Долно Лакочереј, каде што претходно била поставена примарна канализациска мрежа. Реконструиран бил патот кон селото Завој, а асфалт бил поставен и на патот до црквата „Свети Наум“ во Орман и кон манастирот „Успение на Пресвета Богородица“ во Куратица.

На улицата „Кленоец“ била реконструирана водоводната линија и биле изградени атмосферска и фекална канализација, а во тек е и поставување нов асфалт. Во пумпната станица „Метропол“ старата опрема била заменета со нови, автоматизирани и енергетски ефикасни пумпи.

— реклама —

Меѓу позначајните проекти за заштита на животната средина, Пецаков ја издвои изградбата на пречистителна станица во Трпејца.

„Со овој проект создаваме услови за современо управување со отпадните води и дополнителна заштита на Охридското Езеро“, рече Пецаков.

Во областа на образованието, учениците од ООУ „Ванчо Николески“ во Лескоец добиле нова спортска сала, наменета за наставата по физичко образование, спортски настани и рекреација.

— реклама —

Продолжува и реконструкцијата на гимназијата „Свети Климент Охридски“, во која, според Пецаков, во изминатите четири години биле вложени повеќе од 100 милиони денари. Инвестиции се реализираат и во ООУ „Григор Прличев“, а реконструктивни зафати биле изведени и во објектот „Росица“ на градинката „Јасна Ристеска“.

Општината продолжила да доделува стипендии за ученици и студенти, а избрано е и идејното решение за новиот Младински културен центар во поранешната касарна. Следната фаза предвидува изработка на основниот проект и негова понатамошна реализација.

„Од овој простор сакаме да создадеме место што ќе им припаѓа на младите, каде што ќе можат да бидат креативни, продуктивни, да се дружат и да ги реализираат своите идеи“, изјави Пецаков.

Осврнувајќи се на спортот, тој го издвои успехот на ГРК Охрид, кој го освои ЕХФ Европскиот куп. Како дел од културната и туристичката понуда, годинава биле одржани петтото издание на „Охрид вајн фестив“, како и четвртите изданија на „Охрид вотер фестив“ и „Охрид џез фестив“.

— реклама —

Пецаков се осврна и на одлуката на Комитетот за светско наследство на УНЕСКО, според која Охридскиот Регион добил дополнителен рок до 2031 година за спроведување на препораките.

„Оваа одлука претставува значајна можност, но и дополнителна одговорност. Во наредниот период ќе продолжиме уште поинтензивно со спроведувањето на мерките за заштита на природното и културното наследство“, рече Пецаков.

Тој најави продолжување на инвестициите и проектите со цел, како што рече, Охрид да се развива како современ, функционален и туристички препознатлив град.