Она што камерите не го снимиле: Александар Видиновски ја промовира првата книга „На местото на настанот“

Новинарот, уредник и телевизиски водител Александар Видиновски ќе ја промовира својата прва книга „На местото на настанот“ на 5 ноември, четврток, со почеток во 19 часот, во книжарницата „Литература.мк“ во „Дајмонд мол“ во Скопје.

Книгата, објавена во издание на „Арс Либрис“, дел од „Арс Ламина – публикации“, носи лични сведоштва од речиси две децении новинарска кариера, исполнета со известувања од кризни подрачја, драматични настани и ситуации во кои новинарот не е само набљудувач, туку непосреден сведок на историјата.

— реклама —

Од престрелките во Диво Насеље и драматичната ноќ на воениот удар во Турција, до воени зони, несреќи и кризи во Македонија и надвор од неа, Видиновски ги пренесува приказните што останале зад телевизиските прилози и директните вклучувања.

Во „На местото на настанот“ авторот открива што се случува кога камерите ќе се исклучат, со какви ризици се соочуваат репортерите и како се носат одлуки во моменти кога секоја секунда може да биде пресудна.

— реклама —

Книгата не е само хроника на големи настани, туку и лична приказна за стравот, адреналинот, професионалната одговорност и созревањето на новинар кој со години се обидувал да стигне што поблиску до вистината.

На промоцијата за книгата ќе зборува Борислав Тноковски, а специјални гости ќе бидат музичарите Дуке Бојаџиев и Зарина Првасевда.

— реклама —

Александар Видиновски е роден во 1981 година и има речиси две децении искуство во македонското новинарство. Во текот на кариерата работел како теренски новинар, дописник на Македонската информативна агенција од Словенија, уредник и водител на политички дебатни емисии, меѓу кои и „Само вистина“.

Во моментов е уредник и водител во телевизијата Канал 5, а паралелно развива и независна новинарска платформа на YouTube.

— реклама —

Неодамна го доби признанието „Македонствуваме“ на „ЕХО – Фестивалот на планински филм“, за придонесот во подигнувањето на јавната свест за значењето на грижата за природата.

Книгата „На местото на настанот“ наскоро ќе биде достапна во книжарниците „Литература.мк“, како и преку нивната онлајн-продавница.