Контролирани 66 угостителски објекти, откриени непријавени работници и работење без дозволи

Затекнати малолетници по полноќ, точење алкохол на малолетници, незаконско приредување игри на среќа и работење без потребни дозволи се дел од неправилностите откриени при засилените контроли на МВР во угостителски објекти и казина.

Во акцијата спроведена на 17 и 18 октомври, Одделот за криминалистичка полиција, заедно со секторите за внатрешни работи и во координација со надлежните инспекциски служби, контролирал вкупно 66 објекти.

— реклама —

Полициските службеници легитимирале 38 лица, извршиле преглед на 61 лице и едно патничко возило, а го утврдиле идентитетот на 31 лице. Во еден објект било затекнато лице кое работело како обезбедување без лиценца и легитимација, додека во друг бил нарушен јавниот ред и мир. Изречени биле и три глоби за прекршување на Законот за заштита од пушење.

— реклама —

Едно лице било приведено поради одбивање да се легитимира, а тројца странски државјани поради нерегулиран престој во државата. Во еден објект биле затекнати четири малолетници по полноќ, додека во два објекта било утврдено дека се точи алкохол на малолетни лица.

При одделна контрола на патот во близина на селото Мажучиште, прилепско, полицијата запрела возач кој управувал возило под дејство на алкохол. Кај него биле измерени 2,04 промили алкохол во крвта, по што бил лишен од слобода поради сомнение за сторено кривично дело „Безобѕирно управување со моторно возило“ според член 297-а од Кривичниот законик.

— реклама —

Во Кичево, пак, бил извршен претрес на локација каде што незаконски се приредувале игри на среќа. Затекнати биле две лица, а биле одземени и предмети поврзани со случајот. По целосното документирање, ќе следува соодветна пријава.

Во акцијата учествувале и Државниот пазарен инспекторат, Управата за јавни приходи, Државниот инспекторат за труд, Дирекцијата за заштита и спасување и Агенцијата за храна и ветеринарство. Инспекциските служби утврдиле неправилности поврзани со непријавени работници, работење без потребни одобренија, неиздавање фискални сметки, нерегистрирана дејност, промет во девизи, како и недостатоци во хигиенските услови и противпожарната заштита. За утврдените прекршувања биле преземени соодветни мерки и санкции.

Од МВР најавуваат дека ќе продолжат засилените и координирани контроли во угостителските објекти и казината, во соработка со надлежните институции, со цел откривање и санкционирање на незаконските дејствија и зголемување на безбедноста на граѓаните.