СДСМ обвини дека Владата на Христијан Мицкоски ги манипулира граѓаните со ветувања за брза железница, додека во исто време, според партијата, подготвува терен за увоз на мигранти и странска работна сила.
Од опозициската партија велат дека Македонија не е дел од европската мапа за брзи железнички линии и дека најавите за таков проект се без финансиска и реална основа.
„Нема проект, нема пари, нема ништо. Сега, кога немаат што да кажат, повторно се фалат со празни ветувања“, велат од СДСМ.
Според нив, најавите за брза пруга се дел од, како што оценуваат, предизборна стратегија на ВМРО-ДПМНЕ.
Во соопштението СДСМ повторно ја отвора и темата за странските работници, тврдејќи дека Владата уште на почетокот на годината подготвувала политики за нивно зголемено ангажирање во земјава.
„Во јануари Владата донесе уредба за 10.000 економски работници, а беа најавени и значително поголеми бројки во иднина“, наведуваат од партијата.
Од СДСМ тврдат дека европските политики за миграција и депортација на мигранти кон трети земји може да ја стават Македонија во незавидна позиција, обвинувајќи ја Владата дека ја оддалечува државата од европските интеграции.
„Нема да има брза пруга затоа што нема пари. Ќе има мигранти затоа што нема пари“, наведуваат од СДСМ.
Од партијата оценуваат дека Владата се соочува со финансиски проблеми и дека наместо развојни проекти, се потпира на политичка пропаганда и краткорочни решенија.
Владата досега повеќепати ги отфрли ваквите обвинувања, истакнувајќи дека не планира населување мигранти во Македонија и дека работи на реализација на инфраструктурни и транспортни проекти.
