Со поставување камен-темелник започна изградбата на нова трибина на фудбалскиот стадион во населба Илинден, како дел од активностите на Општина Илинден за унапредување на спортската инфраструктура.
Проектот се реализира во повеќе фази, при што претходно, во соработка со Фудбалската федерација на Македонија, беше реконструиран и проширен теренот, поставена нова вештачка трева, изградена заштитна ограда и систем за дренажа, со што се создадени услови за одржување натпревари според современи стандарди.
Со актуелната фаза е предвидена изградба на трибина со капацитет од 1.100 гледачи, како и придружни административни и технички простории. Проектот опфаќа соблекувални, простории за службени лица, санитарни јазли, простор за посетители, магацини и коридор за играчи, како и уредување на околниот простор, паркинг за над 60 возила, осветлување и обновување на комуналната инфраструктура.
На настанот присуствуваа градоначалникот Александар Георгиевски, министерот за спорт Борко Ристовски, пратеничката Драгана Бојковска, претставници на институции и граѓани.
Градоначалникот Георгиевски посочи дека инвестицијата ќе придонесе за подобри услови за спорт и развој на младите, додека министерот Ристовски изрази поддршка за понатамошни проекти во оваа област.
Од Општина Илинден информираат дека ќе продолжат со инвестиции во спортската инфраструктура, при што новата трибина ќе има значајна улога во развојот на спортските активности во општината.
