Општина Охрид распиша тендер за уривање на дивоградбите во Охридскиот регион. Најпрво ќе се уриваат нелегални објекти и остатоци од урбана опрема на плажите. Тендерот е во висина од над 5 милиони денари. Главен критериум за овој тендер е најниска цена, а според објавената јавна набавка договорот ќе биде склучен на 12 месеци.
Пред неколку денови претседателот на Владата на Република Северна Македонија Зоран Заев, во придружба на министерот за транспорт и врски, Благој Бочварски денеска имаше средба со градоначалниците на Општина Охрид Константин Георгиески, на Општина Струга Рамиз Мерко и на Општина Дебрца Зоран Ногачески.
На средбата премиерот Заев истакна дека претстојниот извештај на УНЕСКО треба да се прифати како силен аларм кој повикува на заедничка акција на Владата и надлежните ресорни министерства како централна власт и на oпштините Охрид, Струга и Дебрца, за да се отстранат сите ризици кои го загрозуваат статусот на Oхридскиот Регион и Охридското Езеро како заштитено природно и културно подрачје од страна на УНЕСКО.
Премиерот Заев ја реафирмираше определбата на Владата, во координација со локалните самоуправи на трите општини да се усогласат напорите за спроведување на Планот за управување со културното и природното наследство во Охридскиот Регион со плановите за развој на општините, водејќи грижа на сите вклучени во процесот дека примарна важност имаат заштитата на културните и природните вредности на Охридското Езеро и на крајбрежјето опфатени со Конвенцијата на УНЕСКО за заштита на природното и културното наследство.
Заедничка констатација на средбата беше да продолжи координацијата меѓу Владата и општините Охрид, Струга и Дебрца на утврдените активности, како и на усогласување на легислативата за надлежностите кои ќе овозможат успех во спроведувањето на Планот за управување со културното и природното наследство во Охридскиот Регион и на развојните планови на општините.
Инаку Општина Охрид во јуни минатата година започна со уривање и расчитување на крајбрежниот дел на Охрид, од нелегално поставени објекти и урбана опрема. Но акцијата беше стопирана поради недостаток на финансиски средства. Но се чини дека локалната самоуправа е е цврсто решена да го исчисти Градот од нелегални објекти и во целост да ги спроведе препораките на Унеско, со цел Охрид да го зачува статусот на светско заштитено наследство од УНЕСКО.
фото: Архива
