Основниот кривичен суд Скопје вработува 33 лица на неопределено време

Основниот кривичен суд Скопје објави јавен оглас за вработување на 33 лица на неопределено време, од кои 32 судски службеници и едно лице за технички и помошни работи.

Најголем дел од работните места се наменети за судски референти и соработници. Судот бара осум судски соработници, пет помлади судски соработници, еден самостоен референт – систем-администратор информатичар, 12 судски референти – дактилографи, двајца судски референти – извршители во писарница, четворица помлади судски референти – дактилографи и едно лице за одржување хигиена.

— реклама —

Основната нето-плата за судските соработници изнесува 46.210 денари, додека помладите судски соработници ќе добиваат 42.450 денари. За работното место самостоен референт – систем-администратор информатичар е предвидена плата од 35.494 денари, а за судските референти – дактилографи и извршителите во писарница по 32.924 денари. Помладите судски референти ќе добиваат 31.231 денар, додека основната плата за лицето за одржување хигиена е 30.668 денари.

За позицијата судски соработник се бара завршен правен факултет со најмалку 300 кредити според ЕКТС и положен правосуден испит, како и најмалку една година работно искуство. За помлад судски соработник се бараат најмалку 240 кредити на правен факултет, без услов за претходно работно искуство.

— реклама —

За останатите административни работни места се предвидени различни услови во однос на образованието и работното искуство. Кандидатите за сите работни места треба да имаат активно познавање на македонскиот јазик и да ги исполнуваат општите услови утврдени со Законот за судска служба. За судските службеници се бара и активно познавање на англиски, француски или германски јазик, како и работа со компјутерски програми за канцелариско работење.

— реклама —

Работното време за сите позиции е од понеделник до петок, од 7:30 до 15:30 часот, со половина час дневна пауза.

Рокот за пријавување е 15 дена од денот на објавувањето на огласот во дневните весници. Кандидатите за работните места на судски службеници треба да достават пополнета пријава и докази за исполнување на општите и посебните услови, во оригинал или копија заверена на нотар.

— реклама —

Пријавите може да се испратат по пошта или да се достават во архивата на Основниот кривичен суд Скопје, на булеварот „Гоце Делчев“ б.б., со назнака „Јавен оглас бр. 4/2026“. Образецот за пријавување може да се подигне во приемното одделение на судот, секој работен ден од 8:30 до 14:30 часот.

За работното место за одржување хигиена, кандидатите треба да достават молба за вработување, биографија, мотивациско писмо и докази за исполнување на условите. И овие документи може да се поднесат преку архивата на судот или по пошта на наведената адреса.