Основниот кривичен суд Скопје соопшти дека им одредил мерки на претпазливост на двајца осомничени во предметот што го води Обвинителството за гонење организиран криминал и корупција, а кој се однесува на сомнежи за „примање награда за противзаконито влијание“.
Станува збор за Е.А., в.д. претседател на Основниот суд Гостивар и Б.Д., судски администратор во истиот суд.
На двајцата им се определени мерки: обврска за повремено јавување кај службено лице, одземање на патните исправи, забрана за издавање нови документи за патување, забрана за преминување на државната граница и забрана за вршење работни активности поврзани со кривичното дело.
„На двајцата осомничени определени им се мерките поради основано сомневање за сторено кривично дело – Примање награда за противзаконито влијание“, соопшти Кривичниот суд.
Од судот посочуваат дека не можеле да определат построги мерки, бидејќи обвинителството доставило предлог само за мерки на претпазливост.
„Со оглед дека од страна на обвинителството предлозите беа поднесени за определување мерки на претпазливост, судот не може да одлучи да определи построга мерка за осомничените“, наведуваат од судот.
Претходно, ОЈО ГОКК соопшти дека осомничените во периодот од 2023 до 2025 година, користејќи ја службената положба како претседател и судски администратор, барале и примиле пари за да интервенираат кај судии во Основниот и Апелациониот суд во Гостивар.
Според обвинителството, тие побарале и примиле 8.000 евра за влијание врз судски постапки, а второосомничениот дополнително зел уште 800 евра за да „заврши работа“ поврзана со документ од извршител.
