Од денеска започна седумдневна работна акција за одржување на хигиената на магистралните и регионалните патишта низ државата, која ќе трае до 22 јули, соопшти Управата за извршување на санкциите.
Акцијата се реализира во соработка со ЈП „Македонија пат“, врз основа на потпишан меморандум за соработка, а во неа се ангажирани осудени лица од повеќе казнено-поправни установи.
На почетокот на активностите увид извршија заменик-директорот на ЈП „Македонија пат“, Александар Шуковски, како и Јован Петров и Љупчо Настоски од Кабинетот на директорот на Управата за извршување на санкциите, Александар Пандов.
Во акцијата се вклучени осудени лица од КПД „Идризово“, КПД Штип, КПД Прилеп, како и од КПУ Скопје, Куманово, Битола, Гевгелија, Струмица и Струга.
Од Управата посочуваат дека работното ангажирање се одвива на магистралните и регионалните патишта во непосредна близина на установите во кои осудените ја издржуваат казната и дека тие во текот на целата акција се под постојан надзор на затворската полиција.
