Основното јавно обвинителство Скопје поведе постапка против три лица, осомничени за криумчарење и незаконски промет на медицински препарати штетни по здравјето на граѓаните, додека за едно од лицата се бараат мерки на претпазливост.
Според обвинителството, две лица се гонат за кривични дела Криумчарење и Вршење јавен превоз без лиценца, додека трето лице – сопственичка на салон за убавина, се сомничи за Прикривање на стоки предмет на криумчарење и царинска измама, како и за Производство и пуштање во промет штетни средства за лекување.
Јавниот обвинител до Кривичниот суд предложил мерки на претпазливост за осомничената – обврска за редовно јавување, одземање патна исправа и забрана за контакт со останатите осомничени, со цел обезбедување на постапката.
Случајот произлегува од акција на терен при која на граничниот премин Табановце биле откриени 535 вијали со средство за слабеење и 7.400 етикети со ознаки TIRZ 2.5 мг и TIRZ 5 мг, сокриени во пратка со постелнина.
По контролата, возилото било ставено под надзор и следено до локацијата каде што требало да се изврши примопредавањето. Во моментот на исплатата, осомничената била лишена од слобода, а по налог на обвинител извршен е претрес во нејзиниот салон.
При претресот биле пронајдени дополнителни количини дермални филери, препарати за нивно разградување, производи за редуцирање маснотии, контурирање на лице, отстранување брчки и други средства за подмладување.
За овие производи не постоела документација за нивната безбедност, исправност и законит увоз, а според сомненијата, биле рекламирани и користени врз клиенти.
Против осомничените е поднесена кривична пријава, а истрагата продолжува со обезбедување докази за целосно расчистување на случајот.
