Откриена плантажа на канабис кај Секирник, одземени стебла тешки околу 680 килограми

Две лица од Општина Ново Село биле лишени од слобода откако полицијата открила нелегална плантажа на канабис во атарот на селото Секирник, струмичко. При акцијата биле одземени повеќе стебла со вкупна тежина од околу 680 килограми.

— реклама —

СВР Струмица поднела кривична пријава до Основното јавно обвинителство Струмица против З.М. (34) и А.Т.Г. (30), поради сомнение дека сториле кривично дело „неовластено производство и пуштање во промет на наркотични дроги, психотропни супстанции и прекурсори“ по член 215 од Кривичниот законик.

Според МВР, пријавените по претходен договор обработиле почва и засадиле и одгледувале канабис во сокриен дел од парцела на местото викано „Матник“. Полициските службеници од СВР Струмица, врз основа на судска наредба и со техничка поддршка од Регионалниот центар за гранични работи Исток, презеле повеќе службени дејствија и посебни истражни мерки.

— реклама —

При тоа биле обезбедени докази за нивната поврзаност со одгледувањето на растенијата, по што двајцата биле лишени од слобода и задржани во Полициската станица Струмица.

— реклама —

Во службен разговор, според МВР, тие признале дека обезбедиле семе од канабис, ја обработиле почвата и направиле нелегална плантажа, на која во мај 2026 година ги засадиле семињата и ги одгледувале растенијата со цел производство на марихуана.

Од нив биле одземени повеќе стебла со различна висина, со вкупна тежина од околу 680 килограми.

По поднесувањето на кривичната пријава, З.М. и А.Т.Г. биле изведени пред судија на претходна постапка од Основниот суд Струмица.