Неосветлениот среднобранов антенски столб на ЈП „Македонска радидифузија“ е причината за урнувањето на полицискиот хеликоптер на 10 јули 2014 година кај Струмица, во кој загинаа четворица пилоти на МВР, сметаат вештаците Дарко Данев, професор на Машинскиот факултет во Скопје и Стојко Пејовски, пилот во АРМ, објави МИА.
Двајцата тоа го изјавија на денешното рочиште од судењето за хеликоптерската несреќа во Основниот суд во Струмица.
Професорот Данев смета дека техничката состојба на хеликоптерот не била причина за несреќата.
-Со исклучок на снимачот на глас, кој не работел и кој не морал да функционира, останатите, сите, елементи се уредни. Дали столбот е причина за несреќата затоа што не бил осветлен-да, рече професорот Данев.
Вештакот-пилот во АРМ, Стојко Петковски, беше дециден дека неосветлениот антенски столб е причина за несреќата.
Главна причина за падот е неосветлениот антенски столб и тоа го тврдам со глава, рече Петковски.
Додаде дека од податоците од уредот „БУР“, кој ги бележи податоците за летот, не е забележано никакво отстапување во процедурите за летање.
Судењето продолжува на 27 март.
фото: МИА
