Британската полиција планира да разговара со семејството на Вирџинија Џуфре во рамките на истрагата против принцот Ендру, јавува „Скај њуз“, повикувајќи се на свои извори.
Според телевизијата, истражителите ќе ги разгледаат и претходно изнесените обвинувања за сексуално недолично однесување против принцот Ендру.
Џуфре со години тврдеше дека принцот Ендру сексуално ја нападнал, обвинувања што тој постојано ги негираше. Таа почина во 2025 година на 41-годишна возраст.
Портпарол на локалната полиција претходно изјави дека истрагата за сомнеж за злоупотреба на службената положба сè уште е во тек.
„Не можеме да откриваме детали од истрагата, но ги разгледуваме сите разумни истражни насоки“, изјави портпаролот.
Принцот Ендру беше уапсен на 19 февруари под сомнеж за злоупотреба на службената положба. По сослушувањето беше пуштен да се брани на слобода, додека истрагата продолжува.
Според британското законодавство, делото злоупотреба на службената положба може да опфати повеќе видови незаконско однесување, меѓу кои откривање доверливи финансиски информации, финансиски злоупотреби, намерно занемарување на службените должности и сексуално недолично однесување.
Принцот Ендру ги отфрли сите обвинувања и негира каква било одговорност. Во рамки на истрагата беа извршени претреси и во неговите поранешни резиденции во Виндзор и Норфолк, а полицијата ги анализира собраните докази.
Истрагата беше отворена откако во јануари во САД беа објавени досиеја на ФБИ поврзани со осудениот сексуален престапник Џефри Епстајн.
