Лидерот на Сојузот на независни социјалдемократи, Милорад Додик, побарал од рускиот претседател Владимир Путин Русија во Советот за безбедност на Обединетите нации да ги оспори одлуките на високиот меѓународен претставник во Босна и Херцеговина, Кристијан Шмит, кого властите на Република Српска не го признаваат и го сметаат за нелегален.
Додик ова го изјавил по средбата на делегацијата на Република Српска со Путин во Москва, каде што српските претставници од БиХ биле меѓу ретките странски делегации присутни на воената парада на победата на Црвениот плоштад, централната руска свеченост со која на 9 мај се одбележува победата над нацистичка Германија во Втората светска војна.
Додик изјавил дека очекува Русија на седницата на Советот за безбедност на Обединетите нации да заземе „дефинитивен и ригорозен став“ за состојбата во Босна и Херцеговина и Република Српска.
„Средбата потврди дека Руската Федерација континуирано, без двоумење, во Советот за безбедност ги изнесува своите ставови поврзани со состојбата во Република Српска и БиХ“, изјавил Додик за медиумите од Република Српска.
Расправата за Босна и Херцеговина пред Советот за безбедност е најавена за вторник.
Српските претставници од БиХ претходно извештајот што канцеларијата на Шмит го доставила до Обединетите нации го нарекле „памфлет“ близок до бошњачките ставови. Тие бараат разрешување на германскиот дипломат кој раководи со меѓународната управа во БиХ.
Медиумите во БиХ изминатите денови шпекулираа и за можна смена на Кристијан Шмит.
Шмит претходно ги измени одредбите од Кривичниот законик на БиХ, со што овозможи кривично санкционирање за непочитување на одлуките на високиот претставник.
По тие измени, Додик беше осуден на една година затвор и шест години забрана за политичко дејствување поради неспроведување на неговите одлуки.
Додик во Москва ги потврдил и, како што рекол, одличните односи меѓу Република Српска и Руската Федерација, наведувајќи дека тие не се промениле ниту по укинувањето на американските санкции што му биле воведени.
„Ниту во еден момент не почувствувавме каква било промена во односите. Напротив, на некои прашања им беше посветено многу поголемо внимание отколку порано“, изјавил Додик.
Во делегацијата на Република Српска во Москва биле и претседателот на Република Српска, Синиша Каран, како и претседателот на Народното собрание на Република Српска, Ненад Стевандиќ.
