Американскиот синџир за брза храна „Мекдоналдс“ го избрка од работа извршниот директор Стивен Истербрук поради интимна врска со работничка, што претставува кршење на политиките на компанијата.
Во писмо до компанијата, британскиот бизнисмен ја признал врската со вработената и рекол дека било грешка.
„Со оглед на вредностите на компанијата, се согласувам со бордот дека е време за мене да продолжам понатаму“, напиша Истербрук.
Инаку, 52-годишниот Истербрук, кој е разведен, почнал со работа во „Мекдоналдс“ во 1993 година, како менаџер во Лондон, пред да напредува во компанијата. Тој бил поставен за извршен директор на компанијата во 2015 година.
Истербрук е заслужен за ревитализацијата на менијата и рестораните на фирмата, преку реновирање продавници и користење подобри состојки. Под негово водство, „Мекдоналдс“ исто така ги прошири опциите за испорака и за мобилно плаќање за да ја истакне практичноста.
фото: ФБ „Мекдоналдс“
