Општина Карпош, во соработка со полициски службеници од Полициската станица Карпош, спроведе вонредни инспекциски контроли во урбаната заедница Злокуќани.
Во рамки на акцијата, градежниот инспектор утврдил неправилности поврзани со бесправно изградени објекти, по што се започнати соодветни инспекциски постапки согласно законските надлежности.
Паралелно, комуналниот инспектор, заедно со службите за јавна хигиена, отстранувал кабаст отпад од јавни површини на улицата „Скупи“ и во внатрешноста на населбата. Воедно, повеќе физички лица и домаќинства биле опоменати поради неправилно одлагање отпад и нарушување на јавната чистота.
Инспекциските служби разговарале и со жителите за комуналните проблеми со кои се соочуваат.
Од Општина Карпош најавуваат дека инспекциските контроли ќе продолжат секојдневно, а заедничките акции со полицијата ќе бидат дополнително засилени со цел подобро почитување на законите, јавниот ред и чистотата во Злокуќани.
