Руиниран и напуштен објект на улицата „Петричка“ во Маџир Маало е отстранет од страна на Општина Центар, поради ризикот што го претставувал за безбедноста и здравјето на граѓаните.
По извршената инспекциска проверка било утврдено дека станува збор за импровизирана градба без сопственик, која со текот на времето била претворена во дива депонија и место каде што се собирале глодари и други штетници.
Објектот е отстранет, а просторот е целосно расчистен од шутот и наталожениот отпад.
Градоначалникот на Општина Центар, Горан Герасимовски, посочи дека општинските служби постапуваат на ваквите локации секогаш кога имаат законска надлежност.
„Секаде каде што имаме надлежност, ги расчистуваме ваквите критични точки. Најчесто станува збор за објекти кои со децении имаат проблем со нерасчистени имотно-правни односи. Ваквите стари и распаднати градби со текот на времето стануваат депонии, места каде што се собираат бездомници и животни. Но, секогаш кога законот ни дозволува, постапуваме веднаш и решително, бидејќи безбедноста на граѓаните, хигиената и чистата и здрава животна средина се врвен приоритет“, порача Герасимовски.
Од Општина Центар ги повикуваат граѓаните да ги пријавуваат ваквите локации за надлежните служби навреме да реагираат и да ги отстранат потенцијалните ризици по безбедноста, здравјето и хигиената.
