Градоначалникот на Скопје, Орце Ѓорѓиевски, ги повика занаетчиите да аплицираат на јавниот повик за субвенционирање на дефицитарните занаетчиски дејности, со цел да се зачуваат традиционалните занаети и да се поттикне нивниот понатамошен развој.
Тој истакна дека занаетите се значаен дел од културното наследство, традицијата и идентитетот на Скопје, нагласувајќи дека нивното опстојување е од заеднички интерес.
Право на учество имаат занаетчии со живеалиште во општините Аеродром, Гази Баба, Бутел, Чаир, Ѓорче Петров, Карпош, Кисела Вода, Сарај, Центар и Шуто Оризари, кои ги исполнуваат условите наведени во јавниот повик и ќе ја достават целосната документација.
На повикот можат да се пријават и занаетчии кои во текот на оваа година не користеле финансиска поддршка од Град Скопје, како и лица регистрирани согласно Законот за занаетчиство, со важечка занаетчиска дозвола, кои вршат дејности што бележат континуирано намалување.
„Со оваа мерка даваме конкретна поддршка на луѓето кои со својот труд, знаење и посветеност ја чуваат автентичноста на Скопје. Да не дозволиме старите занаети да останат само спомен од минатото, туку да создадеме услови тие повторно да бидат ценети и привлечни за младите“, порача Ѓорѓиевски.
