Во време кога многу туристички дестинации се соочуваат со прекумерен туризам и последиците што ги остава врз природата, малата островска држава Палау покажува дека постои поинаков пристап.
Станува збор за островска земја во срцето на Микронезија, која стана глобален пример за тоа како природата може да се стави пред профитот и како туризмот може да постои без да го уништува она поради што посетителите доаѓаат.
Палау има повеќе од 500 острови и околу 21.000 жители, но неговите политики привлекуваат светско внимание.
Уште во 2009 година, земјата стана првата во светот што забрани комерцијален лов на ајкули во своите води, создавајќи национално засолниште за овие морски предатори.
Во 2015 година отиде чекор понатаму и стави дури 80 проценти од својата ексклузивна економска зона под заштита од риболов, рударство и индустриска експлоатација.
Една од најпрепознатливите мерки е таканаречената еколошка заклетва што секој турист ја добива при влез во земјата. Посетителите се обврзуваат да ја штитат природата, да не оставаат отпад, да не го нарушуваат морскиот свет и да се однесуваат одговорно.
Посебно внимание привлече и забраната за одредени креми за сончање. Истражувањата покажале дека хемикалии како оксибензон и октиноксат, кои се наоѓаат во многу производи, можат сериозно да им наштетат на коралните гребени и морскиот свет.
Клучна улога во носењето на оваа одлука имале истражувањата во Jellyfish Lake, едно од најнеобичните природни места во светот, каде живеат милиони златни медузи.
Од 2020 година во земјата е забранета продажбата и увозот на креми за сончање што содржат штетни хемикалии. Производите можат да бидат одземени уште при влез во државата, а казните се строги.
Дополнително, секој странски посетител плаќа такса за зачувување на природата, позната како „Pristine Paradise“. Средствата директно се користат за заштита на морињата, коралните гребени и биолошката разновидност.
Во водите на Палау денес живеат повеќе од 1.300 видови риби и околу 700 видови корали, што го прави еден од најбогатите морски екосистеми во светот.
