„Овој правосуден систем со 2% доверба го партизираа СДС и ДУИ, за денес да штитат поединци и моќници блиски до нив“, вели ВМРО-ДПМНЕ

ВМРО-ДПМНЕ преку соопштение обвини дека недовербата во правосудниот систем е последица на, како што тврдат од партијата, долгогодишна партизација на институциите од страна на СДС и ДУИ.

— реклама —

Од партијата велат дека во правосудството биле поставувани кадри блиски до овие политички структури, кои денес, според нив, ги штитат интересите на поединци и политички моќници поврзани со СДС и ДУИ.

Како примери ги посочуваат Весна Дамева, за која тврдат дека била член на партиска комисија на СДС, Добрила Кацарска, која како судија го водеше случајот за 27 април, Наќе Георгиев, кој во периодот на владеењето на СДС напредувал до Врховниот суд, како и Вилма Русковска, која го застапуваше обвинението за случајот „27 април“.

— реклама —

ВМРО-ДПМНЕ ја обвинува поранешната власт и за политичко влијание врз правосудството, наведувајќи го како пример и неодамнешното затворање на истрагата за модуларните болници, со што, според партијата, бил избегнат кривичен прогон на Венко Филипче.

— реклама —

„Ова е класична партизација и инсталација на подобни кадри во правосудството, кои наместо во интерес на правдата и граѓаните, работат за да ги заштитат интересите на СДС и ДУИ“, наведуваат од ВМРО-ДПМНЕ.

Од партијата додаваат дека, според нив, токму примерите што ги посочуваат покажуваат дека политичкото влијание врз правосудството има конкретни лица и позиции.

— реклама —

ВМРО-ДПМНЕ повика да се стави крај на, како што го нарекува, правосудство предводено од СДС и ДУИ и порача дека законот треба еднакво да важи за сите.