Охрид засега спасен од Листата на светско наследство во опасност: Македонија доби уште пет години за исполнување на препораките на УНЕСКО

Комитетот за светско наследство на УНЕСКО одлучи Охридскиот Регион засега да не биде впишан на Листата на светско наследство во опасност, туку на Македонија да ѝ овозможи дополнителен рок за исполнување на препораките за негова заштита.

— реклама —

Одлуката беше донесена на 48. сесија на Комитетот во Бусан, Јужна Кореја, со поддршка од 16 од вкупно 21 земја-членка. Со тоа, земјава добива пет години за реализација на мерките и обврските што ги презеде кон УНЕСКО, врз основа на планот со приоритетни активности доставен од Владата и општините од Охридскиот Регион.

Македонската делегација на седницата ја предводеше амбасадорот во Париз, Игор Николов, заедно со претставници на повеќе државни институции.

— реклама —

Пред гласањето, во предлог-одлуката беше наведено Охридскиот Регион да биде ставен на Листата на светско наследство во опасност поради оценката дека напредокот во исполнувањето на препораките е недоволен и дека дел од заканите за природното и културното наследство сè уште не се надминати.

— реклама —

Премиерот Христијан Мицкоски претходно соопшти дека Владата побарала шестгодишен рок за спроведување на неопходните активности, но Комитетот се одлучил за период од пет години. Тој посочи дека станува збор за проблеми што се создавале со децении и чие решавање бара време, како и координација со Албанија, бидејќи двете земји го делат Охридското Езеро.

Во меѓувреме, локалните самоуправи остануваат надлежни за прашањата поврзани со одобренијата за градба и отстранувањето на бесправно изградените објекти, додека УНЕСКО ќе продолжи да го следи исполнувањето на преземените обврски.

— реклама —

И минатата година Комитетот предложи Охридскиот Регион да биде впишан на Листата на светско наследство во опасност, но тогаш беше одобрен дополнителен едногодишен рок. Одлуката тогаш предизвика реакции кај повеќе организации, кои оценија дека препораките на експертите на УНЕСКО повторно не биле целосно земени предвид.