„Охридски комуналец“ апелира: Градинарскиот отпад да не завршува на депонии

ЈП „Охридски комуналец“ апелира до граѓаните правилно да го селектираат и третираат градинарскиот отпад, предупредувајќи дека неговото одлагање на депонии создава сериозни последици врз животната средина и здравјето на луѓето.

— реклама —

Од претпријатието посочуваат дека кога лисјата, тревата и гранките завршуваат на депонии како Буково, тие се распаѓаат без присуство на кислород и создаваат метан – гас што значително придонесува за климатските промени.

Воедно, при распаѓањето се ослободуваат непријатни мириси, штетни честички и микроорганизми кои можат да предизвикаат иритации на дишните патишта, алергии и влошување на хроничните заболувања кај населението.

— реклама —

Дополнително, мешањето на органскиот со друг отпад создава течности што можат да ја загадат почвата и подземните води.

— реклама —

Како решение, од „Охридски комуналец“ го посочуваат компостирањето, со кое градинарскиот отпад се претвора во природно ѓубриво богато со хранливи материи.

Со тоа се намалува количината отпад што завршува на депонија, се намалуваат штетните гасови, се подобрува квалитетот на почвата и се намалува потребата од хемиски ѓубрива.

— реклама —

„Отпадот е прашање што нѐ засега сите. Селектирај правилно“, апелираат од претпријатието.