Охриѓанец (73) е приведен откако, според полицијата, вперил пиштол кон 51-годишен скопјанец по расправија околу паркирано возило.
Од СВР Охрид соопштија дека настанот се случил вчера околу 12 часот во ходник од станбена зграда во Охрид.
„На 01.08.2026 во 13:05 часот во Охрид, полициски службеници од СВР Охрид го лишија од слобода Т.Р.(73) од Охрид, постапувајќи по претходна пријава дека во 12:00 часот во ходник од станбена зграда во Охрид, по претходно недоразбирање околу паркирано возило вперил пиштол кон Г.К.(51) од Скопје, кој престојувал во истата зграда“, велат од полицијата.
При претрес во неговиот дом биле пронајдени дозвола за оружје, пиштол „Застава“, пушка „Застава“, куршуми и резервни делови.
По целосно документирање на случајот ќе следува соодветен поднесок.
