Крај на интернетот каков што го знаеме: Од 2027 ботoвите ќе бидат побројни од луѓето
Интернетот се движи кон историска пресвртница во која автоматизираните системи ќе ја преземат главната улога во сообраќајот на мрежата. Според проценките изнесени од извршниот директор на технолошката компанија „Клаудфлер“, Метју Принс, активноста што ја генерираат ботови и т.н. AI агенти би можела да ја надмине активноста на човечките корисници веќе во наредниот период, а од 2027 година да стане доминантна.Принс на конференција во Остин оцени дека експанзијата на генеративната вештачка интелигенција го менува самиот ритам на интернетот: додека човек обично посетува неколку веб-страници за да пронајде производ или информација, AI агентите можат да „поминат“ низ илјадници страници во секунда, собирајќи податоци и споредувајќи понуди, извори и детали во име на корисникот.Во периодот пред големиот подем на генеративната AI, ботовите сочинувале околу една петтина од интернет-сообраќајот, а значаен дел од тоа биле легитимни пребарувачи и индексирачи. Но, „гладта“ на новите модели за огромни количини податоци, како и растот на автоматизираните алатки што постојано комуницираат со веб-содржини, според Принс ќе ја промени статистиката драматично и трајно.Тој го спореди овој премин со претходните големи технолошки пресвртници – на пример, преминот од десктоп кон мобилен интернет – и предупреди дека ќе бидат потребни и нови инфраструктурни решенија. Поголемиот обем автоматизирани барања, според оценките, ќе донесе силен притисок врз серверите ширум светот и би можел да го надмине оптоварувањето што мрежата го доживеа во пандемијата.Како можен одговор, Принс најави дека интернетот ќе мора да се прилагоди со создавање милиони привремени, изолирани дигитални средини во секунда – „џебови“ во кои AI-кодот ќе извршува задача и потоа ќе исчезнува. Во таков модел, клучна ќе стане способноста за брза проверка на доверливоста на автоматизираните посетители, заштита од злоупотреби и оптимизација на ресурсите за да не се гушат услугите што ги користат луѓето.Се отвора и пошироко прашање: ако мрежата се наполни со роботи што разговараат со други роботи, колку ќе биде лесно да се разликува корисно од манипулативно, легитимно од штетно, вистинска потреба од „празно“ генерирање сообраќај. Дебатата што допрва ќе се разгорува не е само техничка – туку и општествена – бидејќи од неа ќе зависи како ќе изгледа пристапот до информации, трговијата и безбедноста на интернет во годините што доаѓаат.
Магазин | пред 5 часа