ЏИМИ КИМЕЛ

Кимел одби да се извини за шегата за Меланија, а Белата куќа побара „итно“ да биде отпуштен

Американскиот ТВ-водител и комичар Џими Кимел се најде во центарот на нова политичко-медиумска бура откако одби да се извини за шега во која првата дама Меланија Трамп ја нарекол „идна вдовица“.Реакцијата од Белата куќа дојде брзо и со остар тон. Директорот за комуникации Стивен Чунг јавно го осуди настапот на Кимел, оценувајќи дека коментарите биле неумесни и недостојни, а воедно побара телевизиската мрежа ABC да го отпушти водителот.„ABC треба веднаш да го отпушти и треба да биде избегнуван до крајот на животот“, порача Чунг, обвинувајќи го Кимел дека направил „одвратна шега“ поврзана со напад врз претседателот и дека потоа „удвоил“ наместо да се извини.Претходно, токму Меланија Трамп прва ја критикуваше шегата и ја повика телевизијата да заземе став, тврдејќи дека такви изјави можат да се толкуваат како поттикнување насилство. Подоцна се огласи и Доналд Трамп, кој во објава на Truth Social ја повтори осудата кон Кимел и кон ABC за тоа што дозволиле содржината да се емитува.Кимел, пак, одби да се повлече и да понуди извинување. Тој објасни дека станувало збор за сатира и дека намерата не била да се поттикне омраза или насилство, туку преку хумор да се коментираат јавни личности. Во својата одбрана наведе дека шегата била „лесна“, поврзана со возраста на Трамп и со фактот дека Меланија е помлада.Случајот дополнително ги подгреа поделбите на социјалните мрежи и во медиумите: едни сметаат дека комедијата има граници кога допира до теми како политичко насилство, додека други ја бранат слободата на изразување и правото на сатиричен коментар – дури и кога е непријатен.

Свет | пред 1 ден

Меланија Трамп бесна: „Доста е, ова е неприфатливо“

Меланија Трамп повика телевизијата ABC да реагира поради изјавите на водителот Џими Кимел, во кои ја нарекол „вдовица во исчекување“, во негов монолог емитуван пред пукањето на годишната вечера на Здружението на дописници од Белата куќа.„Доста е. Време е ABC да заземе став. Колку пати раководството на оваа куќа ќе го толерира неприфатливото однесување на Кимел на штета на нашата заедница“, навела Меланија Трамп во објава на социјалната мрежа X.Водителот Џими Кимел во својата емисија во четвртокот се шегувал на сметка на вечерата на дописниците од Белата куќа и ги исмејувал американскиот претседател Доналд Трамп и Меланија, нарекувајќи ја меѓу другото „вдовица во исчекување“, два дена пред настанот кој подоцна бил прекинат поради пукање.„Нашата прва дама Меланија е овде. Погледнете ја, толку е убава. Госпоѓо Трамп, сјаете како вдовица во исчекување“, рекол Кимел.Тој потоа се осврнал и на нејзиниот роденден на 26 април, со шеговити забелешки за тоа како би го прославила.„Планира да слави дома како и секогаш, гледајќи низ прозорецот и шепотејќи: ‘Што направив?’“, рекол Кимел.Според Fox News, дел од најверните поддржувачи на Трамп побарале Кимел да биде отпуштен поради неговите изјави.

Медиасет | пред 3 дена

Џими Кимел се врати на екраните по суспензијата и се извини: „Не сакав да се шегувам со убиство“

Џими Кимел повторно се појави на телевизија доцна во вторникот вечерта, шест дена откако неговата емисија беше суспендирана поради контроверзни коментари во врска со убиството на конзервативниот активист Чарли Кирк. Популарниот водител со емоции им се обрати на гледачите, истакнувајќи дека никогаш немал намера да го омаловажи злосторството.„Не мислам дека има нешто смешно во убиство на млад човек. Ниту пак сакав да обвинам која било група – поентата беше спротивна од тоа“, рече Кимел, додека гласот му се задушуваше од емоции.Продукцијата на „Џими Кимел во живо!“ беше прекината на 17 септември поради неговиот воведен монолог во кој ги критикуваше поддржувачите на Доналд Трамп, обвинувајќи ги дека се обидуваат да извлечат политичка корист од убиството на Кирк. Одлуката за враќање на Кимел на програмата, по помалку од една недела, ја донесе „Дизни“, матичната компанија на телевизијата ABC.Во меѓувреме, Трамп остро реагираше на одлуката, пишувајќи на Truth Social дека е незамисливо Кимел да се врати на малите екрани, нарекувајќи го „демократско ѓубре“ и најавувајќи понатамошни мерки против ABC.Реакции пристигнаа и од Федералната комисија за комуникации. Нејзиниот претседател, Брендан Кар, се закани со истрага и повика телевизиските станици да ја укинат емисијата, во спротивно да се соочат со можни казни или губење на лиценците за емитување.Иако „Дизни“ му даде поддршка, двете најголеми групации на локални телевизиски филијали на ABC – Nexstar Media Group и Sinclair – и натаму ја бојкотираат емисијата.Кимел, четирикратен водител на „Оскарите“, нагласи дека нападите од Трамп не се насочени само кон комичарите, туку и кон новинарите. „Тој ги тужи, ги малтретира. Слободниот печат е исто толку важен колку и правото на сатира“, рече Кимел.Особено емотивно, тој ја истакна и големината на Ерика Кирк, вдовицата на убиениот активист, која јавно изрази простување за обвинетиот 22-годишен студент од Јута.

Магазин | пред 7 месеци

Еј-Би-Си ја повлече емисијата на Џими Кимел поради коментари за убиството на Кирк

Телевизискиот канал Еј-Би-Си ја повлече од програмата ноќната емисија „Џими Кимел во живо“ откако водителот даде забелешки за убиството на конзервативниот активист Чарли Кирк. Повлекувањето следеше по предупредувањата на претседателот на Федералната комисија за комуникации (FCC), Брендан Кар, кој порача дека радиодифузерите би можеле да се соочат со казни или дури со губење на лиценците.Одлуката веднаш предизвика силни политички реакции. Претседателот Доналд Трамп, кој често врши притисок врз медиумите за содржини што ги смета за неприфатливи, ја поздрави веста, додека голем број демократски конгресмени ја оценија како напад врз слободата на говор.Кар, во интервју за конзервативниот коментатор Бени Џонсон, изјави дека прашањето е „многу сериозно“ и дека „Дизни може да го реши лесно или на потешкиот начин“. По неговиот настап, медиумската група Некстстар објави дека ќе престане да ја емитува емисијата во своите 32 филијали, по што и самиот Еј-Би-Си ја потврди одлуката за повлекување.Овој случај е дел од поширока кампања во која десничарските политичари и коментатори предупредуваат јавни личности да бидат внимателни во своите изјави за Кирк. Неколкумина академици, наставници и вработени во компании веќе се соочија со санкции или отпуштања поради објави на интернет.Кимел, познат по честите критики кон Трамп, во својот понеделнички монолог изјави дека „МАГА бандата очајно се обидува да го претстави осомничениот за убиството на Кирк како нешто друго освен како еден од нив“. Тие зборови дополнително го засилија притисокот за негово отстранување од етерот.Чарли Кирк, 31-годишен активист блиску до Трамп и препознатлив по своите остри дебатни настапи, беше смртно застрелан минатата недела на универзитет во Јута. За убиството е обвинет 22-годишен младич, но мотивот сè уште не е јасен.

Свет | пред 7 месеци