Катерина Цаневска: Ѓорѓиевски ја лаже јавноста со измислици за EXIT!
„Кандидатот на ВМРО-ДПМНЕ за градоначалник на Скопје ги излажа скопјани, ги излажа своите сограѓани, оние од кои ја бара довербата,“ изјави Катерина Цаневска Арсовска, кандидатка за советничка во Град Скопје од редовите на СДСМ, на денешната прес-конференција.Таа посочи дека, по матрицата на ВМРО-ДПМНЕ, и Ѓорѓиевски покажал дека за него нема граници кога станува збор за „евтини предизборни манипулации“.„Откако фантазираше за воз по кејот на Вардар и невозможен парк во Вардариште, сега ја кажа најновата лага – дека светскиот фестивал EXIT ќе се сели во Скопје, ама само ако тој победи,“ рече Цаневска Арсовска.Според неа, веднаш по ваквото тврдење следел демант: „Орце го демантираа организаторите на EXIT. Ниту во 2025, ниту во 2026 година нема потврда дека Скопје ќе биде фестивалска локација.“„Значи Орце свесно ја извртува вистината, како што свесно ги лажеше скопјани и со останатите ветувања. Ништо не научил од неговиот вистински лидер, Никола Груевски. Вистината е како шило,“ нагласи таа.„Кога политичар кој бара доверба од граѓаните свесно ги лаже, тоа зборува сè за него и за неговиот карактер. Лагата е првото оружје на секој кој нема визија, нема план и нема капацитет да испорача решенија. Таквите луѓе не им носат ништо добро на граѓаните – напротив,“ додаде Цаневска Арсовска.„Граѓаните на Скопје не се за потценување, тие заслужуваат чесен однос. Скопје заслужува сериозни културни политики, вистински проекти и искрена визија за развој, а не евтини кампањски трикови и измислици за дневна употреба,“ рече таа.На крајот, Цаневска Арсовска порача: „СДСМ го повикува Ѓорѓиевски веднаш да престане со лагите. Градот не е играчка, туку дом на луѓе кои бараат решение за реалните проблеми кои ги создаде токму ВМРО-ДПМНЕ.“
Скопје
|
пред 3 месеци
