Чкембарите бараат одговорност по испаѓањето на Пелистер: Објавете ги сите договори и виновниците
По завршувањето на една од најразочарувачките сезони во поновата историја на клубот, навивачката група Чкембари јавно побара одговорност од сите кои, според нив, придонеле за лошите резултати на ФК Пелистер.Во објава на социјалните мрежи, тие наведуваат дека изминатиот период бил исполнет со разочарување, дебати и меѓусебни несогласувања околу причините за неуспехот, но дека и покрај сè, до крајот му давале поддршка на клубот, со надеж дека сезоната ќе заврши позитивно.Чкембари бараат целосна транспарентност во работењето на клубот и инсистираат јавно да бидат објавени сите договори на лицата кои не се фудбалери, како и сумите што им биле исплаќани и нивните конкретни улоги во клубот.„Да се тргнат прашањата и обвинувањата во јавноста, да се завршат рекла-казала муабетите. Одважете се и објавете ги јавно“, порачуваат навивачите.Во реакцијата се бара и јавно да се соопшти кој ги одобрувал трансферите на фудбалерите во текот на сезоната, оценувајќи дека токму селекцијата на тимот е една од главните причини за лошите резултати и играта на екипата.Навивачката група поставува прашања и за улогата на поединци во носењето на одлуките во клубот, нагласувајќи дека одговорноста не смее да биде избегната.„Виновците за оваа катастрофа имаат име и презиме. Овој пораз не е дојден сам од себе. Одговорност од сите до еден што го донесовте клубот на ова ниво“, стои во пораката на Чкембари.Реакцијата доаѓа во период кога во Битола се очекуваат одговори и анализи за причините што доведоа до една од најтешките сезони за Пелистер и незадоволството кај навивачите и спортската јавност.
Спорт | пред 10 часа