ИЛДИКО ЕЊЕДИ

Се стопив од среќа кога освоив „Златна мечка“ на Берлиналето: интервју со унгарската режисерка Илдико Ењеди

Унгарската режисерка Илдико Ењеди ја освои наградата за посебен придонес во филмската уметност на фестивалот „Киненова“, кој неодамна се одржа во Скопје. Таа беше и претседател на годинешното жири на фестивалот.Истакнатата режисерка повеќе од 30 години снима филмови и освојува награди во Европа, меѓу кои и „Златна мечка“ во Берлин за филмот „За телото и душата“, кој потоа беше номиниран и за „Оскар“. Иако со години е во филмскиот свет, Илдико ни призна дека не знае многу за македонската кинематографија.„Жал ми е, навистина не знам многу за македонските филмови. Деновиве сум во Скопје, го разгледував градот, имав време да се прошетам. Не барав локација за мојот следен филм, но би сакала локалните филмски работници да имаат доволно пари и да прават сопствени филмови за својот град и за својата култура“, рече Ењеди за „Репортер“.Првиот филм го сними 1989 година и веднаш ја освои наградата на фестивалот во Кан. Денес ѝ е многу полесно оти во текот на годините ја стекнала почитта на мажите со кои работи. Па вели: „Екипата секогаш ги тестира младите режисери да види дали си ја знаат работата. Тоа е интересна игра во која секогаш сакав да победам, а кога ќе ја добијам нивната почит, да можеме да работиме убаво. Во оваа работа не е само предизвик да се биде жена режисер, туку да се биде режисер од Источна Европа. Не сум воинствен тип, но со мојата работа се обидувам да им ја олеснам работата на идните генерации филмаџии“.Во муабетот ни раскажа за Холивуд, номинацијата за „Оскар“ и дали ја очекувала наградата на Берлиналето, кој е најголемиот филмски фестивал во Европа. Но, и за тоа колку ѝ било тешко да се пробие во светот на мажите, зошто сама ги пишува сценаријата за своите филмови и дали приватниот живот ѝ трпел поради кариерата, колкава поддршка ѝ е сопругот во текот на сите овие години и што најмногу ѝ се допаѓа во Скопје... гледајте го видеото.

Магазин | пред 3 години

Почнува 7. МФФ Киненова: На режисерката Илдико Ењеди ќе и биде врачена наградата за особен придонес во филмската уметност

Со доделување на наградата за особен придонес во филмската уметност на режисерката Илдико Ењеди и проекција на хрватскиот филм „Чичко“ во режија на Давид Капац и Андрија Мардешиќ, со Мики Манојловиќ и Горан Богдан во главните ролји вечерва во 20 часот почнува седмото издание на МФФ Киненова.Илдико Ењеди е една од најоригиналните авторки на денешнината. Со својот прв долгометражен филм од 1989 година, „Мојот 20 век“ ја доби „Златната камера“ во Кан, во 2017 ја освои „Златната мечка“ во Берлин, а вечерва македонската публика ќе има можност да ја запознае одблиску оваа авторка.Во нејзина чест, в недела (9 октомври) во киното „Милениум“ ќе биде прикажан филмот „Приказна на мојата сопруга“/ The Story of My Wife, а во понеделник напладне во ЕУ хаус, Ењеди ќе одржи мастерклас.МФФ Киненова до 14 октомври ќе се одвива под слоганот „Првиот остава трага“ и во киното „Милениум“ и во Кинотека, љубителите на филмската уметност ќе уживаат во актуелните први и втори остварувања на новите режисерски имиња во седмата уметност, кои гледаат на светот со отворени и љубопитни очи, поставувајќи бројни прашања во своите филмови кои се релевантни и на овие простори.Осум филмови се дел од официјалната компетиција за фестивалските награди, меѓу кои има и филмови од Романија, Полска, Србија, Италија, Турција и од Косово.Во рамките на фестивалски содржини се „Режисерот во фокус“, австрискиот маг Михаел Ханеке, чии први три филмови го трасираа неговиот пат до европскиот и светски врв, потоа, изборот на филмови од актуелната португалска и ирска кинематографија, како и соработката со полскиот фестивал „Вистула“, кој на домашните кино платна ќе ни ја претстави тамошната актуелна кинематографија.

Магазин | пред 3 години