Кос без дипломатски ракавици: Уставните измени се единствениот начин!
Еврокомесарката за проширување Марта Кос синоќа испрати јасна порака од Европскиот парламент: за Северна Македонија да продолжи по патот кон ЕУ, мора да ги усвои уставните амандмани.Во обраќањето за време на дебатата за Извештајот за напредокот на земјава што го подготви европратеникот Томас Вајц, Кос нагласи дека пристапувањето кон Европската Унија е главен двигател на клучните реформи и дека Скопје има историска можност да направи исчекор.„Владата во Скопје има историска можност и одговорност да направи решавачки чекор кон ЕУ и да го искористи моментумот на проширување што е очигледно, постои. Ние продолжуваме да ја поддржуваме Северна Македонија на нејзиниот пат кон Европската Унија“, изјави Кос.Таа истакна дека со усвојувањето на Извештајот, Унијата испраќа јасен сигнал на поддршка за европската перспектива на земјава, но и укажува на конкретните чекори што мора да се преземат за напредок во преговорите.„За време на моите разговори со лидерите на Северна Македонија во Скопје, минатата недела, ја истакнав нашата посветеност како ЕУ да ја поттикнеме земјата да продолжи напред во процесот на пристапување. Исто така, во неколку наврати, потсетив на потребните чекори што треба да се преземат за да се отворат пристапните преговорите за кластерот ‘Основани вредности’. Единствен начин за тоа е да се усвојат уставните амандмани“, рече Кос.Таа наведе дека земјава веќе има испратено ажурирани патокази до Европската комисија за владеење на правото и реформа на јавната администрација, како и дека активно работи на Планот за раст на Западен Балкан.„Овие напорите не треба да запрат тука, бидејќи спроведувањето на реформите е од суштинско значење“, истакна еврокомесарката.Според неа, извештајот за Северна Македонија претставува избалансирана проценка на состојбата во земјата, со јасни препораки за приоритетите: владеење на правото, основните човекови права, независно судство, борба против корупцијата и ефикасна администрација.„Извештајот за Северна Македонија дава сеопфатна и избалансирана проценка на ситуацијата во земјата, вклучително и во клучните области, како што е владеењето на правото. Северна Македонија треба да ги засили реформите, особено во областа на прашањата за основните права и треба дополнително да го зајакне владеењето на правото, независноста на судството, борбата против корупцијата и да ја реформира јавната администрација“, рече Кос.На крајот, таа упати благодарност до Европскиот парламент за поддршката на демократските процеси во земјава.„Изразувам благодарност до Европскиот парламент за неговиот постојан ангажман во зајакнувањето на демократските процеси во земјава и неговата клучна улога во охрабрувањето на сите политички сили конструктивно да работат заедно на унапредување на нејзиниот пристапен пат“, заклучи Кос.
Македонија | пред 5 месеци