КИРИЛ И МЕТОДИЈ

Епископот Партениј: Залудно е да градиме храмови, ако самите не станеме храмови Божји

Неговото преосвештенство епископ Антаниски г. Партениј, на вечерната богослужба во бигорскиот скит во село Битуше, испрати силна духовна порака по повод празникот на светите Кирил и Методиј и споменот на 318-те свети Отци од Првиот вселенски собор.Во словото, епископот порача дека „новиот Израил“ не е народ определен по крв и потекло, туку заедница на верни кои Го примаат Христос.„Избран народ денес е оној што Го прифаќа Бог Света Троица за Отец свој, и Неговото откровение го прими како вера своја“, рече Партениј.Тој објасни дека старозаветниот Израил бил избран поради верата во вистинскиот Бог, а не поради сила или потекло, додавајќи дека денес „сите оние кои Го примаат Христа за свој Бог – тие се новиот Израил, новиот богоизбран народ“.Во беседата, епископот направи паралела меѓу старозаветните откровенија, Првиот вселенски собор во Никеја и делото на светите браќа Кирил и Методиј.„Тие им ја дадоа азбуката на Словените – не за да пишуваат само букви, ами за да можат да се молат на Бога на својот мајчин јазик“, истакна Партениј.Тој потсети дека светите браќа го превеле Евангелието и ја вовеле богослужбата на разбирлив јазик, со што словенските народи биле воведени во „новиот Израил“.Во завршниот дел од словото, епископот испрати порака дека најважно е човекот самиот да стане храм Божји.„Залудно е ако градиме храмови од тула и од камен, а самите не се изградиме како храмови на Светиот Дух“, порача епископот Партениј.Богослужбата се одржа во бигорскиот скит во село Битуше, во навечерието на празникот на светите рамноапостолни Кирил и Методиј.

Македонија | пред 1 седмица

Сиљановска-Давкова: Кирил и Методиј се темел на духовниот и културниот идентитет на македонскиот народ

Претседателката Гордана Сиљановска-Давкова по повод 24 Мај – Денот на светите браќа Кирил и Методиј, порача дека нивното дело претставува темел на духовниот и културниот идентитет на словенските народи, меѓу кои и на македонскиот народ.„Малкумина луѓе во историјата имале чест да бидат перцепирани од многу народи и држави како апостоли и заштитници на Европа. Такви се солунските браќа“, порача претседателката.Таа истакна дека Кирил и Методиј се творци на глаголицата, просветители и описменувачи на словенските народи, додавајќи дека нивното дело и денес има силна обединувачка моќ и претставува заедничко цивилизациско наследство.„Кирил и Методиј го изградија и се вградија во темелот на духовниот и културниот идентитет на словенските народи, меѓу кои и на македонскиот“, наведува Сиљановска-Давкова.Таа нагласи дека јазикот не е само средство за комуникација, туку и носител на колективната меморија, вредностите и чувството на припадност на еден народ.„Јазикот не е само збир на зборови, туку и колективна меморија, вредносен код и чувство на припадност што еден народ ги пренесува низ времето“, истакна претседателката.Во пораката, Сиљановска-Давкова оцени дека денешното време на поделби и отуѓеност е потсетник дека без култура, образование, наука и вредносен систем не може да се изгради доверба и заедништво во едно општество.„Светите Кирил и Методиј ја отворија можноста словенскиот човек својата мисла, вера и културна самосвест да ги артикулира на јазикот што го разбира и чувствува како свој“, порача таа.На крајот, претседателката го честита празникот 24 Мај – Денот на светите браќа Кирил и Методиј.

Македонија | пред 1 седмица

Филипче: Да го чуваме македонскиот јазик и да обезбедиме европска иднина

Претседателот на СДСМ, Венко Филипче, по повод 24 Мај – Денот на сесловенските просветители Светите браќа Кирил и Методиј, порача дека нивната мисија има непроценлива улога во создавањето на словенската писменост и во развојот на македонскиот јазик и духовност.„Мисијата на браќата Кирил и Методиј има непроценлива улога во промовирањето на стремежот за еднаквост на народите и рамноправност на јазиците, но и во создавањето на македонската писменост“, напиша Филипче.Тој истакна дека Охрид е еден од најзначајните центри на словенската писменост и потсети дека преку нивните следбеници, меѓу кои и Свети Климент Охридски, била создадена кирилицата.„Со создавањето на глаголицата, а потоа и преку продолжувањето на нивната мисија од страна на нивните следбеници, е создадена кирилицата, која е основа за стандардизација на македонскиот јазик и писмо“, наведе Филипче.Тој порача дека, како што рече, никој не може да го загрози македонскиот јазик и идентитет.„Денес кога се шират измислени и лажни закани за македонскиот јазик и идентитет, важно е да потсетиме дека никој не може да го загрози она што е меѓународно потврдено. Благодарение на државничките одлуки на СДСМ, македонскиот јазик е признат и рамноправен во Европската Унија. Македонскиот идентитет е потврден“, истакна лидерот на СДСМ.Филипче додаде дека денешната обврска е да се чува и унапредува македонскиот јазик, но и да се обезбеди европска иднина за младите генерации.„Светите Кирил и Методиј нè учеа дека напредокот доаѓа преку знаење, просветителство и отвореност кон светот“, порача тој, честитајќи го празникот.

Македонија | пред 1 седмица

Македонија повторно без универзитет на Шангајската листа за 2025 година

И годинава, ниту еден универзитет од Македонија не се најде меѓу најдобрите во светот според најновата Шангајска листа, што уште еднаш ја отвора темата за длабоките системски слабости во високото образование.На врвот на рангирањето по 23-ти пат е Харвард, а веднаш зад него се редат Стенфорд, МИТ, Кембриџ и Оксфорд – институции со глобален академски престиж и врвни научни резултати.Рангирањето се базира на шест показатели: број на добитници на Нобелова награда и Филдсов медал, објавени трудови во престижните списанија Nature и Science, високо цитирани истражувачи, број на индексирани научни трудови, како и вкупни перформанси по глава на жител.

Македонија | пред 9 месеци