КЛИНИКА ЗА ПЛАСТИЧНА ХИРУРГИЈА

Клиниката за пластична хирургија со итно предупредување по случајот со фалсификуван ботокс

Универзитетската клиника за пластична и реконструктивна хирургија во Македонија упати итен апел до граѓаните по откривањето на случај со употреба на фалсификуван ботокс, предупредувајќи ги сите кои неодамна биле подложени на естетски третмани со невротоксини или филери да бидат особено внимателни на можни компликации.Од Клиниката истакнуваат дека пациентите мора внимателно да ја следат својата состојба по ваквите интервенции и при најмало отстапување од очекуваниот процес на закрепнување веднаш да побараат медицинска помош. Се нагласува дека секоја невообичаена физичка реакција по апликација на препаратите треба сериозно да се сфати.Лекарите препорачуваат брза реакција при први знаци на компликации, како и навремена консултација со матичен или специјалистички лекар. Дополнително се апелира граѓаните секогаш да се информираат за потеклото и сертификатите на препаратите што се користат во естетските третмани.Овој случај повторно го отвора прашањето за контролата и безбедноста во естетската медицина, како и за заштитата на пациентите од неквалитетни и потенцијално опасни производи. Надлежните институции, како што е наведено, веќе преземаат мерки за расчистување на случајот.Од Клиниката предупредуваат дека игнорирањето на симптомите може да доведе до сериозни здравствени последици, поради што навремената медицинска процена е од клучно значење.

Македонија | пред 5 часа

SupportKocani ја реализираше донацијата за Универзитетската клиника за пластична хирургија во Скопје

Иницијативата SupportKocani успешно ја реализираше донацијата наменета за повредените од трагичниот настан што се случи на 16 март 2025 година во Кабаре клуб „Пулс“ во Кочани со Универзитетската клиника за пластична и реконструктивна хирургија – Скопје.Донацијата е формализирана со потпишување на договор за донација, а вклучува 100 комплети T-LAB PRP KIT, 10 комплети EXOMINE SMART KIT, 4 пакувања аминокиселини и 4 пакувања протеини. Вкупната вредност на донацијата изнесува 286.120 денари, и е целосно обезбедена преку донации од хумани граѓани и компании, кои континуирано ја поддржуваат иницијативата SupportKocani.Донираните материјални добра се наменети за третман и регенерација на кожата, забрзување на зараснување на рани и подобрување на опоравувањето кај пациентите со тешки повреди од изгореници. Нутритивната поддршка претставува дополнителна помош за јакнење на организмот во процесот на рехабилитација.Медицинската опрема и суплементи се веќе доставени на Универзитетската клиника за пластична и реконструктивна хирургија – Скопје, каде активно се користат во третманот на повредените.Во рамки на посетата, тимот на SupportKocani ги посети и пациентите кои сè уште се хоспитализирани на Клиниката и лично им изрази поддршка и желби за побрзо закрепнување.„Продолжуваме со фокусирана, директна и одговорна поддршка за секој поединец кој е засегнат од трагедијата. Оваа соработка со една од клучните здравствени установи во државата претставува важен чекор во обезбедувањето на стручна медицинска нега. Искрено им благодариме на сите хумани граѓани, компании и поддржувачи – токму тие ја направија оваа помош возможна,“ – истакнуваат од SupportKocani.Иницијативата останува посветена на транспарентност, партнерство со институциите и долгорочна грижа за сите погодени лица.

Македонија | пред 9 месеци