Наградата за мир отиде во Венецуела: Мачадо победничка, Трамп разочаран
Лидерката на венецуелската опозиција Марија Корина Мачадо е добитничка на Нобеловата награда за мир за 2025 година. Таа е наградена за своите напори во промовирањето на демократијата и човековите права во Венецуела, како и за водењето на мирна борба против авторитарното владеење во земјата.Како лидер на демократското движење во Венецуела, Марија Корина Мачадо претставува еден од највпечатливите примери на граѓанска храброст во Латинска Америка во поново време. Наградата ѝ се доделува за нејзината неуморна работа во промовирањето на демократските права и борбата за праведна и мирна транзиција од диктатура во демократија, изјави претседателот на Норвешкиот Нобелов комитет, Јорген Ватне Фриднес.Во соопштението, Нобеловиот комитет ја нарече Мачадо „шампион на мирот што го одржува пламенот на демократијата да гори среде растечката темнина“.Нобеловата награда за мир е една од петте оригинални награди утврдени со тестаментот на Алфред Нобел во 1895 година. За разлика од другите награди, кои ги доделуваат шведски институции, оваа награда ја доделува Норвешкиот Нобелов комитет, составен од пет членови избрани од норвешкиот парламент.Објавата доаѓа во момент кога американскиот претседател Доналд Трамп повторно изрази уверување дека токму тој ја заслужува наградата. На Генералното собрание на ОН минатиот месец, Трамп изјави дека „сите велат дека треба да ја добијам Нобеловата награда за мир“.Шпекулациите дека Трамп би можел да биде награден се засилија по објавата дека Израел и Хамас се согласиле на првата фаза од мировниот план што тој го предложи. Сепак, експертите посочуваат дека тоа било предоцна за годинашниот избор, бидејќи процесот на номинирање заврши уште на 31 јануари.Иако Трамп тврдеше дека придонел за завршување на повеќе конфликти во светот, аналитичарите се сомневаат дека неговата лобистичка кампања за Нобеловата награда некогаш ќе вроди со плод.
Свет | пред 3 месеци