Муцунски од Даблин: Ирска останува силен поддржувач на македонскиот пат кон ЕУ
Министерот за надворешни работи и надворешна трговија Тимчо Муцунски, за време на работната посета на Даблин, оствари средба со ирската министерка за надворешни работи, трговија и одбрана Хелен Мекенти, при што во фокусот на разговорите беа билатералната соработка и европската интеграција на земјата.На средбата беше потврдена подготвеноста на двете држави за натамошно унапредување на политичките, економските и трговските односи, како и за продлабочување на соработката во повеќе области од заемен интерес.Посебно внимание беше посветено на процесот на европска интеграција во пресрет на претстојното ирско претседавање со Советот на Европската Унија, кое започнува на 1 јули. Муцунски изрази благодарност за континуираната ирска поддршка на политиката на проширување и на европските аспирации на Македонија.Тој ја нагласи определбата на Владата за продолжување на реформите и напредокот на европскиот пат, посочувајќи дека членството во Европската Унија останува стратешка цел и двигател на демократскиот и економскиот развој на државата.Соговорниците разменија мислења и за актуелните регионални и глобални предизвици, при што оценија дека во услови на зголемени безбедносни и геополитички ризици, неопходни се поголема солидарност, единство и соработка меѓу европските партнери.Во рамки на посетата на Ирска, Муцунски се сретна и со претседавачот и членовите на Заедничкиот комитет за прашања поврзани со Европската Унија при двата дома на ирскиот парламент.На средбата тој повторно се заблагодари за поддршката што Ирска ја дава на процесот на проширување на Европската Унија и на европскиот пат на земјата, при што беше разговарано и за актуелната состојба во евроинтегративниот процес.Муцунски ја истакна посветеноста на Владата на реформите, особено во делот на владеењето на правото, борбата против корупцијата и јакнењето на институциите, нагласувајќи дека кредибилен процес на проширување, заснован на заслуги и исполнување на Копенхашките критериуми, е од суштинско значење за зачувување на довербата во Европската Унија и нејзината трансформативна улога во регионот.
Македонија | пред 5 часа