Српскиот кошаркар Милан Момчиловиќ се откажа од НБА и потпиша договор вреден 6,5 милиони долари
Српскиот кошаркар Милан Момчиловиќ донесе изненадувачка одлука да се откаже од настап на претстојниот НБА драфт и кариерата да ја продолжи во универзитетската кошарка, потпишувајќи за Универзитетот Кентаки.Момчиловиќ, кој важеше за еден од најбараните играчи во NCAA трансфер-порталот, го избра Кентаки пред понудите од Луисвил и Аризона.Според американските медиуми, вредноста на неговиот NIL-договор, кој ги опфаќа маркетиншките права и комерцијалните активности на спортистите, се движи меѓу шест и 6,5 милиони долари. Со тоа тој се вбројува меѓу најплатените универзитетски кошаркари во Соединетите Американски Држави.Крилниот кошаркар, висок 203 сантиметри, зад себе има одлична сезона во дресот на Ајова Стејт, каде што просечно постигнуваше 16,9 поени по натпревар и шутираше неверојатни 48,7 проценти за три поени, што беше најдобар процент во целата NCAA конкуренција.Воедно, тој беше меѓу најдобрите и според бројот на погодени тројки, завршувајќи на петтото место во САД со 136 реализирани удари зад линијата за три поени.Меѓу неговите најдобри настапи се издвојуваат натпреварите против Синсинати, кога постигна 34 поени со осум тројки, против Оклахома Стејт со 29 поени и пет тројки, како и дуелот против Аризона на турнирот на конференцијата Биг 12, каде што уфрли 28 поени и осум тројки.Во текот на трите сезони поминати во Ајова Стејт, Момчиловиќ учествуваше во 83 победи на тимот и два настапа меѓу 16-те најдобри екипи на NCAA турнирот.Минатата сезона беше избран и во втората најдобра петорка на конференцијата Биг 12.На почетокот на април, Момчиловиќ објави дека ќе го напушти Ајова Стејт и паралелно ќе се пријави и на НБА драфтот и во трансфер-порталот. Тој помина низ целосниот преддрафт процес и доби покана за престижниот NBA Draft Combine камп.Таму уште еднаш ги потврди своите шутерски квалитети, реализирајќи речиси 69 проценти од обидите во четирите официјални шутерски вежби.Сепак, непосредно пред истекот на рокот за повлекување од драфтот, Момчиловиќ реши да остане во колеџ-кошарката и да го облече дресот на Кентаки, кој со неговото доаѓање добива едно од најголемите засилувања за сезоната 2026/27.
Спорт | пред 20 часа