(Видео) Тројца загинаа при уривање на надвозник во Сеул
Тројца луѓе загинаа, а тројца се повредени при уривање на конструкција на градилиште за демонтажа на надвозник во Сеул, соопштија јужнокорејските власти.Несреќата се случила во округот Сеодамун, каде што се вршело уривање на надвозникот „Сеосомун“. Според првичните информации, девет лица, меѓу кои раководител на градилиштето, надзорник и инженери, извршувале безбедносна инспекција без да бидат поставени заштитни потпори.Властите соопштија дека дел од конструкцијата и скелето ненадејно се урнале во форма на буквата „V“, при што пет лица паднале од височина од околу шест метри и останале затрупани.Меѓу загинатите се 60-годишен раководител на градилиштето, 50-годишен инженер и главниот надзорник. Повредените се пренесени во болница.Експертите жестоко ја критикуваа организацијата на инспекцијата, посочувајќи дека уште рано наутро биле забележани знаци на можна нестабилност, откако конструкцијата потонала за 2,9 сантиметри.„Требало да се постават потпори или кранови за дополнително обезбедување пред да започне проверката“, изјавија стручњаци за градежништво.Од градските власти во Сеул соопштија дека во моментот ризикот бил проценет како низок и дека деталниот план за обезбедување требало да биде донесен по инспекцијата.Несреќата предизвика и голем хаос во железничкиот сообраќај, бидејќи под надвозникот минува железничката линија Гјонги-Џунганг, по која дневно поминуваат повеќе од 340 возови, вклучително и KTX композиции.Железничкиот сообраќај меѓу станиците Сеул и Хенгсин беше привремено прекинат, а на национално ниво сообраќајот функционирал со околу 80 проценти од редовниот капацитет.Полицијата отвори истрага и ги анализира безбедносните планови и процедурите за да утврди дали биле почитувани прописите.Надвозникот „Сеосомун“, долг 570 метри, бил изграден во 1966 година, а демонтажата започнала минатата година поради сериозно оштетување и опасност од паѓање бетонски делови.
Свет | пред 3 часа