Дизајнерка го тужи „Скимс“ на Ким Кардашијан за кражба на име
Мала њујоршка дизајнерка покрена правна битка против модниот бренд „Скимс“ на Ким Кардашијан, чија вредност се проценува на околу пет милијарди долари. Таа тврди дека компанијата го презела името на нејзиниот бренд и го претворила во успешна линија производи што носи стотици милиони приходи, објавува „Дејли мејл“.Во тужбата се наведува дека „Скимс“ ја лансирал колекцијата „Fits Everybody“ и покрај претходните предупредувања од помалиот бренд „Fits Everybody To A T“, кој тврди дека ги обезбедил правата на името години порано. Според документите поднесени пред суд во Њујорк, големата компанија била предупредена, но сепак продолжила со развој на линијата.Адвокатката на тужителката изјавила дека станува збор за класичен пример на „обратна забуна“, правна ситуација во која голема компанија го засенува помал бренд до степен што потрошувачите погрешно го поврзуваат оригиналот со копија. Таа додава дека клиентката својот бизнис го градела со години пред појавата на „Скимс“.Во тужбата се тврди дека брендот на Кардашијан користи големи финансиски ресурси и маркетинг-моќ за да доминира на пазарот, поради што бизнисот на тужителката станал речиси невидлив во интернет-пребарувањата.Спорот околу заштитниот знак трае подолго време, а Американската канцеларија за патенти и заштитни знаци веќе одбила една од пријавите на „Скимс“ поради можност за забуна со постоечкиот бренд.Тужителката бара обештетување, предавање на добивката од спорната линија, како и забрана за користење на името. „Скимс“ засега не се изјаснил за случајот, а компанијата побарала дополнително време за одговор пред судот.
Магазин | пред 4 часа