СМРТНА КАЗНА

Иран егзекутира млад каратист осуден за учество во протести

Иран изврши смртна казна над 21-годишниот каратист Сасан Азадвар, кој беше уапсен за време на протестите, во период кога Обединетите нации и организациите за човекови права предупредуваат на нагло зголемување на смртните казни и масовни апсења, пренесува Еуроњуз.Сасан Азадвар Џонкани, млад спортски првак во карате, беше погубен во затворот Дастгерд во Исфахан. Тој беше уапсен на почетокот на јануари за време на протестните собири.Според иранските правосудни органи, Азадвар бил осуден за „непријателство против Бог“ и за наводна соработка со „непријателот“. Обвиненијата се поврзани со наводни инциденти за време на протестите, вклучително и напади врз безбедносните сили.Од друга страна, организациите за човекови права тврдат дека случајот е обележан со сериозни правни нејаснотии и дека обвинетиот бил подложен на тортура со цел да се изнуди признание. Тие наведуваат и дека немало веродостојни докази против него.Според податоци на Обединетите нации, Иран од почетокот на конфликтот извршил смртна казна над најмалку 21 лице и привел повеќе од 4.000 луѓе, додека Амнести Интернешнл предупредува на зголемен број егзекуции, присилни исчезнувања и случаи на мачење.Претставници на иранското правосудство порачаа дека судските процеси ќе се водат забрзано и дека земјата нема да ги прифати меѓународните повици за прекин на извршувањето на смртните казни.

Свет | пред 2 седмици

САД најавува забрзување на примената на федералните смртни казни

Министерството за правда на Соединетите Американски Држави соопшти дека има намера да ја забрза примената на федералните смртни казни, вклучително и проширување на методите на извршување на казната со воведување на стрелачки водови. Оваа одлука претставува промена во политиката спроведувана за време на администрацијата на Џо Бајден, која постепено се оддалечуваше од примената на смртната казна на федерално ниво, пренесува Си-Ен-Ен.Во новите насоки на Министерството се наведува повторно воведување на протоколот за смртоносна инјекција користен за време на првиот мандат на Доналд Трамп, како и проширување на методите за извршување, кои покрај инјекција би вклучувале и стрелачки вод. Се најавува и поедноставување на внатрешните процедури со цел забрзување на процесите што водат до извршување на смртната казна.Во моментов, смртта со стрелачки вод е дозволена во пет сојузни американски држави за осуденици кои ги исцрпиле сите правни лекови. Во март во Јужна Каролина на тој начин бил погубен маж осуден за двојно убиство, што било четврто вакво извршување во САД од 1970-тите години.В.д. државниот обвинител Тод Бланш изјави дека претходната администрација не ја исполнила својата должност кон американските граѓани. Тој додаде дека Министерството, под водство на претседателот Трамп, повторно го спроведува законот и стои на страната на жртвите.Министерството исто така соопшти дека сака да ја поедностави постапката за барање смртни казни и да го намали времето помеѓу изрекувањето на пресудата и самото извршување.

Свет | пред 3 седмици

Одлука што менува сѐ: Израел воведува смртна казна за Палестинци?

Контроверзен предлог-закон со кој се воведува смртна казна за Палестинци осудени за тероризам пристигна на финално гласање во Кнесетот, откако парламентарниот Одбор за национална безбедност ја одобри мерката, пренесува „Гардијан“.Законот е инициран од крајнодесничарската партија Оцма Јехудит, предводена од министерот за национална безбедност Итамар Бен-Гвир, и веќе предизвика остри реакции кај критичарите кои предупредуваат на сериозна ескалација на казнената политика на Израел.Пратеници од партијата носеле брошеви во форма на јамка како симболична поддршка за предлогот. Според предложените измени, осудените на смрт би биле сместени во изолирани објекти без право на посети, освен од овластен персонал, додека правната комуникација би се одвивала исклучиво преку видеоврска. Извршувањето на казната би следело во рок од 90 дена од пресудата.Предлогот предвидува судовите да можат да изречат смртна казна и без барање од обвинителството, како и без едногласна одлука – би било доволно обично мнозинство. Воените судови на Западниот Брег исто така би добиле овластување да изрекуваат вакви казни, со можност министерот за одбрана да даде свое мислење.За Палестинците под окупација, законот би ја укинал можноста за жалба или помилување, додека за осудениците во рамки на Израел казната би можела да се преиначи во доживотен затвор. Според извештаите, можно е егзекуциите да се извршуваат со бесење, иако се споменуваат и други методи.Предлогот предизвика сериозни предупредувања од воени и владини претставници, кои сметаат дека може да биде во спротивност со меѓународното право и да ги изложи израелските функционери на правни последици. Министерствата за правда и надворешни работи веќе изразија загриженост во изминатиот период.Критичарите, меѓу кои и пратеникот Гилад Карив, посочуваат дека краткиот рок за извршување на казната без можност за помилување отвора сериозни правни и морални дилеми и може да доведе до постапки пред меѓународни судови. И покрај тоа, предлог-законот продолжува да напредува низ парламентарната процедура.

Свет | пред 1 месец

Кина со најостра мерка против корупцијата: Погубен поранешниот директор на „Хуаронг“

Кина продолжува со крајно строгата политика против висока корупција, а најновиот случај е погубувањето на поранешниот генерален директор на државната финансиска корпорација „Хуаронг“, Бај Тјенхуи, во Тјенџин.Како што пренесува државната агенција „Синхуа“, смртната казна е извршена откако Врховниот народен суд ја потврдил пресудата, со која Бај беше осуден за примање мито во вредност поголема од 156 милиони долари. Според судските наоди, во периодот од 2014 до 2018 година тој користел службени позиции за да им обезбеди на одредени компании пристап до државни средства и поволни договори, во замена за пари и подароци.Бај првично беше осуден во мај 2024 година, со мерки што ја вклучуваа и конфискацијата на целиот имот, како и трајно одземање на политичките права. Неговата жалба беше одбиена во февруари 2025 година, што ја отвори патеката за конечната потврда од Врховниот суд. „Синхуа“ додава дека на Бај му било дозволено да се сретне со семејството непосредно пред извршувањето на казната.Овој случај е дел од пошироката антикорупциска стратегија на Пекинг, која последната деценија резултираше со низа строги пресуди во финансискиот сектор. Во 2021 година беше погубен и Лаи Сјаомин, поранешен претседател на истата корпорација „Хуаронг“, што тогаш предизвика големо меѓународно внимание.Западните медиуми оценуваат дека Кина сè почесто ја применува смртната казна како средство за демонстрација на морална строгост и политичка контрола во клучните економски сектори. Организациите за човекови права, пак, остануваат критични, укажувајќи дека земјата не објавува официјални податоци за бројот на погубувања.

Свет | пред 5 месеци