Тоблероне му се потсмева на новиот електричен Ферари: „Ова никогаш нема да се случи“
Првиот целосно електричен модел на Ферари, „Луче“, продолжува да предизвикува бурни реакции на социјалните мрежи, а сега во критиките се вклучи и познатиот швајцарски производител на чоколади, Тоблероне.Компанијата објави фотографија од својата чоколада редизајнирана во стилот на новиот Ферари. Наместо препознатливите триаголни врвови, чоколадата беше прикажана со заоблен и мазен изглед, во светлосина боја слична на една од претставените верзии на автомобилот.Покрај фотографијата стоеше пораката: „Ова нема да се случи“, а потоа беше додадено дека Тоблероне „секогаш ќе ги задржи аглите“. Објавата брзо стана вирална и беше протолкувана како директна шега на сметка на дизајнот на новиот модел на Ферари.Од претставувањето на „Луче“, социјалните мрежи се преплавени со критики и споредби. Дел од корисниците го споредуваат автомобилот со компјутерски глушец или со обичен хечбек, додека вештачки генерирани видеа со основачот на компанијата, Енцо Ферари, станаа хит на интернет.Критики пристигнаа и од поранешниот претседател на Ферари, Лука ди Монтеземоло, кој јавно изрази незадоволство од новиот модел.„Ако кажам што навистина мислам, ќе го навредам Ферари“, изјави Монтеземоло, додавајќи дека компанијата ризикува да „уништи една легенда“.И покрај контроверзниот изглед, Ферари нагласува дека „Луче“ располага со импресивни перформанси. Автомобилот има четири електромотори со вкупно 1.050 коњски сили и забрзува од 0 до 100 километри на час за само 2,5 секунди.Сепак, барем засега, вниманието на јавноста е насочено повеќе кон неговиот изглед отколку кон неговите технички карактеристики.
Магазин | пред 2 часа