Почина Мартин Треневски, поранешен министер, дипломат и новинар
Почина Мартин Треневски, поранешен министер, амбасадор и новинар, соопшти неговото семејство.Треневски беше роден во 1949 година во Скопје и во текот на својата долгогодишна професионална кариера остави значаен белег во македонското новинарство, дипломатијата, државните институции и врските со македонското иселеништво.Дипломирал на Филолошкиот факултет при Универзитет „Св. Кирил и Методиј“, на групата англиски јазик и литература, а постдипломски студии по масовни комуникации и информирање посетувал на Институтот за социолошки и правно-политички истражувања, каде што се стекнал со звање магистер по политички науки.Новинарската кариера ја започнал во Скопје, пишувајќи за повеќе дневни, неделни и месечни информативни гласила. Професионалниот врв во новинарството го достигнал во тогашната агенција ТАНЈУГ, каде што во 1986 година бил именуван за дописник од Австралија и Јужниот Пацифик. Во тој период активно ја следел и афирмирал македонската заедница во Австралија.Како публицист и истражувач, Треневски е автор на бројни дела.Со осамостојувањето на државата, Треневски беше именуван за министер за информации во првата влада на Република Македонија. Подоцна, како министер во Министерството за иселеништво, работеше на унапредување на врските меѓу државата и македонското иселеништво.Во дипломатската кариера беше амбасадор на Македонија во Шведска, Норвешка, Финска и Естонија, генерален конзул во Торонто, Канада, како и македонски амбасадор во НАТО.Треневски беше активен и во политичкиот живот како член и активист на ВМРО-ДПМНЕ од почетоците на партијата.За својата работа како новинар, публицист и дипломат добитник е на повеќе домашни и меѓународни награди и признанија, меѓу кои и највисоката новинарска награда во Македонија – Мито Хаџивасилев-Јасмин во 1983 година.Погребот ќе се одржи утре, на 27 мај 2026 година, во 13 часот на Градските гробишта Бутел.
Македонија | пред 6 часа