Дури и утринското кафе влијае на мозокот во текот на ноќта
Утринската шолја кафе за многумина е незаменлив дел од денот, но новите научни сознанија покажуваат дека нејзиното влијание врз организмот може да трае многу подолго отколку што се претпоставува.Според ново истражување објавено во научното списание „Nutrients“, кофеинот може да ја менува активноста на мозокот дури и за време на спиењето, нарушувајќи го квалитетот на одморот и часови откако ќе исчезне неговото непосредно стимулирачко дејство.Истражувачите анализирале 32 научни студии спроведени во период подолг од четири децении, кои го испитувале влијанието на кофеинот врз мозокот за време на спиењето.Резултатите покажале дека, иако луѓето можат да заспијат по консумирање кафе, кофеинот продолжува да влијае врз мозочната активност. Наместо бавните мозочни бранови, кои се карактеристични за длабок и обновувачки сон, кај лицата кои консумирале кофеин се забележува поголема активност на побрзи бранови поврзани со состојба на будност.Научниците наведуваат дека тоа значи оти сонот станува помалку ефикасен, а мозокот потешко се опоравува и ги обработува информациите и сеќавањата собрани во текот на денот.Дополнително, истражувањето покажало дека кофеинот може да ја намали способноста на организмот да го надомести недостигот од сон. Со други зборови, дури и по непроспиена ноќ, мозокот потешко влегува во подлабок сон неопходен за закрепнување доколку во организмот има остатоци од кофеин.Иако е очекувано поголемите количини кафе и кофеинот внесен подоцна во текот на денот да имаат посилен ефект, дел од анализираните студии покажале дека и утринската шолја кафе може да остави доволно активни материи во телото за да влијае врз мозочната активност во текот на ноќта.Експертите посочуваат дека влијанието на кофеинот не е исто кај сите луѓе. Возраста, генетиката и брзината на метаболизмот играат важна улога во тоа колку долго кофеинот останува во организмот и како влијае врз квалитетот на сонот.Поради тоа, некои луѓе можат без проблем да испијат кафе и навечер, додека кај други дури и една утринска шолја може да има последици врз ноќниот одмор.
Магазин | пред 3 часа