„Македонија турист“ ги продава хотелите „Бристол“ и „Јадран“, вложува 17,7 милиони евра во Ново Лисиче
Компанијата „Македонија турист“ планира значајна реорганизација на своето портфолио на недвижности, со продажба на неколку познати објекти во центарот на Скопје и истовремена инвестиција во нов градежен проект во населбата Ново Лисиче.Според предлог-одлуките објавени на Македонската берза, за кои акционерите треба да одлучуваат на собранието закажано за 22 мај 2024 година, за продажба се предвидени повеќе објекти што имаат историска и урбана вредност, но моментално не се во функција. Меѓу нив се хотелот „Јадран“, познат и како Арапска куќа, изграден во 1930-тите и ставен под заштита, како и хотелот „Бристол“, еден од најстарите хотели во Скопје, кој не работи од 2012 година. На листата се и објектот „Пивница“ на плоштадот „Македонија“ и трикатна зграда во строгиот центар на градот.Од компанијата наведуваат дека останатите нивни хотели, меѓу кои „Холидеј ин“, „Бест вестерн“, „Белви“ и „Хотел Карпош“, ќе продолжат со редовно работење.Паралелно со продажбата, „Македонија турист“ планира инвестиција од 17,7 милиони евра во градежно земјиште во Ново Лисиче. Станува збор за парцела од 8.081 квадратен метар, на која, според важечкиот ДУП, е предвидена изградба на станбено-деловен комплекс со вкупна бруто-површина од околу 35.000 квадратни метри. Проектот, според најавите, ќе биде проследен и со соодветни јавни давачки и даноци.Со оваа одлука компанијата практично се насочува кон нови развојни проекти и модерни станбено-деловни капацитети, додека се повлекува од управување со дел од постарите објекти во централното градско подрачје.
Македонија | пред 9 часа