ЈП „Охридски комуналец“ упати потсетување до компаниите и домаќинствата за важноста од правилното одлагање на картонската амбалажа, посочувајќи дека несоодветното постапување со овој вид отпад создава дополнителни проблеми и непотребни трошоци.
Од претпријатието нагласуваат дека особено е значајно правните субјекти кои произведуваат поголеми количини картонски отпад да ги спакуваат и свиткаат картонските кутии пред нивното одлагање. Доколку тие се фрлаат во нивната оригинална форма, контејнерите многу побрзо се исполнуваат, често се преполнуваат, а дел од отпадот завршува расфрлан околу нив.
Според ЈП „Охридски комуналец“, ваквата практика го отежнува процесот на собирање и транспорт на материјалот наменет за рециклирање, а комуналните служби се соочуваат со дополнителни интервенции и повици за подигнување отпад надвор од предвидениот распоред, што финансиски го оптоварува претпријатието.
Од таму потсетуваат дека голем дел од правните субјекти, како и одредени домаќинства, располагаат со соодветни садови за одлагање хартија и картон, односно оградени метални или сини контејнери, кои треба да се користат на правилен начин.
„Апелираме картоните да се одлагаат спакувани. Отпадот е прашање кое нѐ засега сите. Селектирај правилно!“, порачуваат од ЈП „Охридски комуналец“, повикувајќи на поголема одговорност и еколошка свест кај граѓаните и деловната заедница.
