Пациентките со рак на дојка останаа без терапија, Онкологија бара трпение, но не открива кога ќе пристигне лекот „Фесго“

Пациентките кои вчера имаа закажана терапија „Фесго“ на Клиниката за онкологија во Скопје останаа без лекот, а засега нема информација кога ќе биде обезбеден. Клиниката јавно им се извини на засегнатите жени и побара трпение и разбирање, но не соопшти конкретен датум за продолжување на третманите.

Од установата признаваат дека одложувањето предизвикало загриженост и наведуваат дека се свесни за важноста на навременото и непрекинато лекување. Сепак, и покрај извинувањето, пациентките остануваат во неизвесност, бидејќи нивните закажани термини поминале, а нов датум не е утврден.

— реклама —

Проблемот, според Клиниката, е поврзан со дистрибуцијата и испораката на лекот, кои, како што наведуваат, се „надвор од директната контрола на Клиниката“. Од установата уверуваат дека преземаат мерки во рамките на своите надлежности за терапијата да биде обезбедена што е можно побрзо. Во соопштението, сепак, не е наведено кој е одговорен за застојот, ниту кога се очекува тој да биде надминат.

„Фесго“ се користи за лекување одредени форми на HER2-позитивен карцином на дојка. Според Европската агенција за лекови, препаратот ги содржи активните супстанции пертузумаб и трастузумаб и се применува како поткожна инјекција во рамките на пропишаниот онколошки третман.

— реклама —

Проблемите со испораката на терапиите претходно биле посочени и од раководството на Клиниката. На 8 октомври, директорот Игор Стојковски изјави дека понекогаш може да дојде до минимално доцнење поради недостатоци во дистрибуцијата. Тој најави и дека се разгледува можноста за тригодишни набавки на дел од терапиите, најверојатно преку јавната набавка за 2027 година. Сепак, само осум дена подоцна, пациентките повторно се соочија со одложување на лекувањето.

— реклама —

На проблемите со континуитетот во снабдувањето со лекови претходно предупредуваа и пациентските здруженија. На 6 август, кога започна надминувањето на тогашниот недостиг на дел од терапиите, Ана Марјановиќ од здружението „Хема-Онко“ побара долгорочна стратегија, посочувајќи дека повременото пристигнување пратки не гарантира сигурност во лекувањето.

„Не можеме да се бориме со ракот со ад хок решенија, со краткотрајни решенија“, порача тогаш Марјановиќ.

Повторувањето на проблемите со снабдувањето отвора прашања за одговорноста на раководството на Клиниката, Министерството за здравство и Фондот за здравствено осигурување. Останува нејасно што е преземено по претходните предупредувања и како ќе се обезбеди пациентките да не зависат од навременоста на испораките за да ја примат пропишаната терапија.

Во последното соопштение Клиниката не го наведе ниту бројот на пациентки погодени од одложувањето. Посочено е само дека ќе се настојува лекот да биде обезбеден во најкус можен рок, без конкретен датум за испорака и за продолжување на одложените третмани.