Пацифичката островска држава Науру официјално го промени своето име во Република Наоеро, враќајќи се на традиционалниот назив во обид да го зацврсти националниот идентитет и да го зачува културното наследство.
Промената следува откако парламентот во мај усвои уставен амандман со кој се предвидува новото име на државата. Иако првично беше најавено дека за ова прашање ќе се одржи национален референдум, претседателот Дејвид Адеанг соопшти дека од таа постапка се откажува.
Тој објасни дека не постои потреба од референдум, бидејќи името Наоеро не е нов поим за граѓаните, туку претставува традиционален назив што со години се користи во секојдневниот говор, се наоѓа на државниот грб и е признаен со Уставот.
Во иднина, краткиот назив на државата ќе биде Наоеро, а нејзините жители ќе се нарекуваат „деи-Наоеро“.
Историски гледано, европските колонизатори го вовеле името Науру затоа што им било тешко да го изговорат изворниот назив Наоеро. Оваа држава, со околу 12.000 жители, е трета најмала во светот, веднаш по Ватикан и Монако.
Претседателот Адеанг нагласи дека одлуката не е политички мотивирана, туку претставува чекор кон зачувување на наследството на предците и зацврстување на националниот идентитет за идните генерации. Владата веќе ги известила меѓународните организации и другите држави за промената, а процесот на официјална примена на новото име е во тек.
