„Падна Орбан, падна Вучиќ, сите знаеме кој е следен“ – Филипче со порака до македонската власт

Претседателот на СДСМ, Венко Филипче, ја поздрави прогласената победа на студентската листа на парламентарните избори во Србија, оценувајќи ја како историска, а истовремено испрати порака за политичките случувања во Македонија.

„Честитки до граѓаните на Србија за големата, историска победа! Како што најавивме, следува ослободување од криминалните структури на власта. Падна Орбан. Падна Вучиќ. Сите знаеме кој е следен“, напиша Филипче во објава на социјалните мрежи.

— реклама —

Со оваа порака, лидерот на СДСМ ги поврза политичките промени во Унгарија и изборните случувања во Србија со состојбите во Македонија, алудирајќи на можноста за промена на власта и во земјава.

— реклама —

Филипче изрази очекување дека Србија и Македонија ќе продолжат да ги развиваат билатералните односи.

„Очекувам Србија и Македонија да градат најдобри можни односи, засновани на меѓусебно почитување и соработка“, порача тој.

— реклама —

Во продолжение упати порака до македонските граѓани, најавувајќи политичка борба против актуелната власт.

„На граѓаните на Македонија им порачувам дека нè чека борба, ни малку лесна, затоа што се бориме против остатокот од оваа криминална балканска група“, напиша Филипче.

Неговата реакција следува по признавањето на изборниот пораз од Александар Вучиќ и објавувањето на прелиминарните процени според кои студентската листа освојува парламентарно мнозинство. Конечните резултати од изборите во Србија треба да ги потврди Републичката изборна комисија.