Украинскиот парламент денеска ја прифати оставката на премиерката Јулија Свириденко, со што автоматски престана мандатот на целата Влада на Украина.
За прифаќање на оставката гласаа 258 пратеници во Врховната рада. Пред гласањето, Свириденко им се заблагодари на пратениците за соработката во изминатата година, како и на претседателот Володимир Зеленски за довербата што ѝ ја укажал.
Претседателот на парламентот, Руслан Стефанчук, претходно соопшти дека оставката на премиерката официјално била доставена до Врховната рада.
„Му благодарам на Јулија Анатолиевна за работата во исклучително тежок период за државата, за придонесот во зајакнувањето на економијата, поддршката на граѓаните и напредокот на Украина кон Европската Унија“, изјави Стефанчук.
Претседателот Зеленски претходно најави реконструкција на Владата како дел од новата политичка стратегија, која предвидува и промени во раководството на безбедносните и правосудните институции.
Свириденко беше избрана за премиерка на 17 јули 2025 година.
Според украинските медиуми, гласањето за составот на новата влада се очекува да се одржи на 16 јули. Дотогаш, функцијата премиер привремено ќе ја извршува првиот вицепремиер и поранешен премиер Денис Шмихал.
