Падот на „Мајкрософт“ е предупредување за светот: Современото општество зависи од неколку компании

Глобалниот прекин на услугите на „Мајкрософт“ повторно ја отвори дебатата за големата зависност на современото општество од неколку технолошки компании. Проблемите ги погодија болниците, банките, државните институции и бројни компании, покажувајќи колку брзо технички дефект кај еден голем снабдувач може да предизвика последици низ целиот свет.

Прекинот ги зафати услугите Microsoft 365, меѓу кои Outlook, Teams и Copilot. Според податоците на Downdetector, проблеми биле пријавени во 74 земји и територии. Од компанијата објасниле дека причината била неуспешна промена во мрежните поставки по претходна надградба на мрежните капацитети, а не кибернапад.

— реклама —

Последиците биле особено забележливи во здравствениот систем во Велика Британија, каде дел од болничкиот персонал немал пристап до електронската пошта, па одредени установи морале да користат хартиена документација. Проблеми имало и во правосудството, полицијата, училиштата и финансискиот сектор, каде некои трансакции биле потврдувани преку факс.

— реклама —

Случајот повторно го наметна прашањето за зависноста од неколку големи компании, како „Мајкрософт“, „Амазон“ и „Гугл“, чии услуги за компјутерска инфраструктура во облак ги користат бројни институции и бизниси. Така, различни организации можат да зависат од иста технолошка инфраструктура, па еден дефект да предизвика истовремени проблеми во повеќе сектори.

Ова не е прв ваков случај. Во јули 2024 година, неисправно ажурирање на безбедносниот софтвер на компанијата CrowdStrike предизвика проблеми кај околу 8,5 милиони компјутери со оперативниот систем Windows. Беа погодени авиокомпании, болници, банки и медиуми.

— реклама —

Експертите предупредуваат дека организациите мора да имаат независни резервни системи и редовно да проверуваат дали можат да функционираат кога главната инфраструктура ќе стане недостапна. Резервните копии и алтернативните платформи нема да бидат доволни доколку и тие зависат од истиот снабдувач.

— реклама —

Европската Унија веќе воведува построги правила за дигитална отпорност, меѓу кои регулативата ДORA за финансискиот сектор и директивата NIS2 за кибербезбедноста на клучните сектори.

Глобалниот прекин повторно го отвори и прашањето за дигиталната независност на Европа и зависноста од американските технолошки компании. Решението, според анализите, не е откажување од нивните услуги, туку поголема разновидност на снабдувачи, посилен надзор и планови за непречено функционирање во случај на долготраен прекин.