Паника во средното уметничко училиште: Солзавец активиран за време на час

Вознемирувачки инцидент се случил во средното уметничко училиште „Лазар Личеноски“ во Скопје, каде што ученик активирал солзавец за време на наставата, предизвикувајќи паника и страв меѓу присутните. Родителите реагираат дека и една недела по настанот сè уште нема конкретен одговор од надлежните институции, пренесува телевизија Сител.

— реклама —

Инцидентот се случил за време на часот по сликарство, кога ученик од четврта година, од насоката сликарски дизајн, активирал солзавец во училишното ателје.

— реклама —

Во обид да побараат помош, учениците се упатиле кон училишниот менаџмент, но наишле на затворени врати. Професорот тој ден бил отсутен, а единствена помош им пружила класната раководителка, која реагирала и презела мерки за заштита на учениците.

Учениците сакале да разговараат и со училишниот психолог, но таа не била на работното место. Отсуствувал и директорот на училиштето, од кого исто така побарале помош.

— реклама —

Родителите бараат итно санкционирање на ученикот кој го предизвикал инцидентот, како и утврдување одговорност кај надлежните лица во училиштето.

— реклама —

Директорката на Државниот просветен инспекторат за Сител ТВ изјавила дека претставката била примена претходниот ден и веќе била процесуирана. Најавен е вонреден инспекциски надзор, по кој инспекторот ќе одлучи дали и какви мерки ќе бидат преземени.